آئی ٹی سی این ایشیاء کا 26واں ایڈیشن 23 سے 25 ستمبر سے منعقد ہوگا

700 سے زائد نمائش کنندگان ،100سے زائد اعلی سطحی غیر ملکی وفودشریک ہونگے’ محمد عمیر نظام
پاکستان کا آئی ٹی سیکٹر محض ایک صنعت نہیں ،معاشی تبدیلی کا انجن ہے ‘گروپ ڈائریکٹر ای کامرس گیٹ وے پاکستان
کراچی (ڈیلی پاکستان آن لائن )آئی ٹی سی این ایشیا کا 26واں ایڈیشن 23سے 25ستمبر تک منعقد ہوگا۔مذکورہ ایونٹ ”ای کامرس گیٹ وے پاکستان ”کے زیر اہتمام پاکستان کی سب سے بڑی آئی ٹی اور ٹیلی کام ایکسپو اور کانفرنس ہے جس کا انعقاد کراچی کے ایکسپو سینٹر میں ہوگا۔یہ تاریخی ایونٹ وزارت آئی ٹی اینڈ ٹیلی کام کے وژنری اقدام، ٹیک ڈیسٹینیشن پاکستان کے ساتھ شراکت داری میں پیش کیا جا رہا ہے اور اسے خصوصی سرمایہ کاری سہولت کونسل کی توثیق حاصل ہے ۔تین روزہ نمائش کا آغاز وفاقی وزیر برائے آئی ٹی اینڈ ٹیلی کام شزافاطمہ خواجہ کریں گی۔یہ قابل ذکر ہے کہ گزشتہ سال آئی ٹی سی این ایشیا میں 500 ملین ڈالر کے شاندار مفاہمتی یادداشتوں پر دستخط کیے گئے تھے۔گزشتہ سال کی نسبت امسال اس ایونٹ سے زیادہ توقعات وابستہ کی جارہی ہیں۔ای کامرس گیٹ وے پاکستان کے گروپ ڈائریکٹر محمد عمیر نظام نے بتایا کہ آئی ٹی سی این ایشیا کے 26ویں ایڈیشن میںامریکہ ،برطانیہ، آسٹریلیا،ترکیہ، آذربائیجان، سعودی عرب، متحدہ عرب امارات، اردن، مصر، چین، انڈونیشیا ، ملائیشیا ، فلپائن سمیت دیگر ممالک سے وفود شریک ہوں گے ۔عالمی ایونٹ میں50,000سے زائد افراد شرکت کریں گے جن میں ٹیک رہنما، سٹارٹ اپس، سرمایہ کار، پالیسی ساز اور سفارتکار شامل ہیں جس سے اسٹریٹجک شراکت داری کو فروغ دیا جائے اور قومی ڈیجیٹل معیشت کو آگے بڑھانے میں مدد ملے گی ۔انہوں نے بتایا کہ عالمی ایونٹ میں 700سے زائد نمائش کنندگان اور 100سے زائد اعلی سطحی غیر ملکی وفودشامل ہوں گے جن میں معروف ٹیک کمپنیاں، سٹارٹ اپس اور بین الاقوامی پویلینز شامل ہیں، جو مصنوعی ذہانت ، سائبر سکیورٹی ، فن ٹیک، ای کامرس اور 5جی ٹیکنالوجیز میں ترقی کی نمائش کریں گے۔محمد عمیر نظام نے کہا کہ پاکستان کا آئی ٹی سیکٹر محض ایک صنعت نہیں ہے یہ ہماری معاشی تبدیلی کا انجن ہے جو ریکارڈ برآمدات پیدا کر رہا ہے، اربوں کی سرمایہ کاری کو راغب کر رہا ہے اور ہمارے نوجوانوں کے لیے روزگار کے اہم مواقع پیدا کر رہا ہے۔انہوں نے کہا کہ اپنی 25سالہ میراث پر استوار کرتے ہوئے، آئی ٹی سی این ایشیا پاکستان کے سب سے بڑے آئی ٹی، ٹیلی کام اور ٹیک ایونٹ کے طور پر دنیا کی بڑی معیشتوں کے وفود کی میزبانی کر چکا ہے۔