امریکی صدر ڈونلڈ ٹرمپ پینٹاگون میں ہونے والی تقریب میں شرکت کریں گے
امریکا میں 11 ستمبر 2001 کے دہشت گرد حملوں کی 25ویں برسی منائی جارہی ہے، جس کے موقع پر نیویارک، واشنگٹن اور پنسلوانیا سمیت مختلف مقامات پر یادگاری تقریبات منعقد کی جارہی ہیں۔
حملوں میں تقریباً 3 ہزار افراد ہلاک ہوئے تھے اور اس واقعے نے امریکی سیاست، سلامتی اور خارجہ پالیسی پر گہرے اثرات مرتب کیے۔
11 ستمبر 2001 کو حملہ آوروں نے چار مسافر طیارے ہائی جیک کیے تھے۔ دو طیارے نیویارک کے ورلڈ ٹریڈ سینٹر کے ٹوئن ٹاورز سے ٹکرائے، ایک پینٹاگون سے ٹکرایا جبکہ چوتھا طیارہ پنسلوانیا میں گر کر تباہ ہوگیا۔
25ویں برسی کے موقع پر نیویارک کے گراؤنڈ زیرو، پینٹاگون اور فلائٹ 93 کے مقام پر خاموشی کے لمحات، پھولوں کی چادریں چڑھانے اور متاثرین کے نام پڑھنے کی تقریبات ہورہی ہیں۔
اس سال نیویارک کی تقریب میں ان افراد کو بھی خصوصی طور پر یاد کیا جارہا ہے جو حملوں کے بعد زہریلی گرد و غبار سے متاثر ہوئے اور بعد میں مختلف بیماریوں کے باعث انتقال کرگئے۔
امریکی صدر ڈونلڈ ٹرمپ پینٹاگون میں ہونے والی تقریب میں شرکت کریں گے، جبکہ نائب صدر جے ڈی وینس نیویارک میں 9/11 میموریل کی تقریب میں شریک ہوں گے۔ نیویارک میں متاثرین کے اہل خانہ 2,977 افراد کے نام پڑھیں گے۔
9/11 حملوں کے بعد امریکا نے افغانستان اور عراق میں جنگیں شروع کیں، ہوم لینڈ سکیورٹی کا محکمہ قائم کیا اور ملک میں نگرانی و انسداد دہشت گردی کے نظام کو وسیع کیا۔ اس واقعے کے بعد امریکی معاشرے میں مسلمانوں کے خلاف تعصب اور نفرت انگیز واقعات میں اضافے کی بحث بھی سامنے آئی۔
25 سال گزرنے کے باوجود 9/11 کی یاد امریکی معاشرے میں گہری موجود ہے۔ ایک تازہ سروے کے مطابق تقریباً نصف امریکی بالغ افراد اسے اپنی زندگی کا سب سے اہم تاریخی واقعہ قرار دیتے ہیں، جبکہ نئی نسل اس سانحے کو زیادہ تر تعلیمی اور تاریخی تناظر میں جان رہی ہے۔
