حادثہ مغربی کردفان میں النہود کے قریب واقع ایک سونے کی کان میں پیش آیا

خرطوم: سوڈان کے مغربی کردفان کے علاقے میں سونے کی ایک کان منہدم ہونے سے کم از کم 60 کان کن ہلاک ہوگئے، جبکہ متعدد افراد اب بھی لاپتا ہیں اور ان کے ملبے تلے دبے ہونے کا خدشہ ہے۔

رائٹرز کے مطابق حادثہ مغربی کردفان میں النہود کے قریب واقع ایک سونے کی کان میں پیش آیا۔ مقامی ذرائع کے مطابق کان کے کئی حصے منہدم ہوئے، جس کے بعد امدادی کارروائیوں کے دوران اب تک 60 لاشیں نکالی جاچکی ہیں۔

حادثے میں بچ جانے والے افراد کے مطابق مزید کان کن لاپتا ہیں اور خدشہ ہے کہ وہ ملبے تلے پھنسے ہوئے ہیں۔ کان میں حفاظتی انتظامات کی کمی کو ایسے حادثات کے خطرات میں اضافے کی ایک بڑی وجہ قرار دیا جاتا ہے۔

سوڈان میں چھوٹی اور غیر رسمی سونے کی کان کنی بڑے پیمانے پر جاری ہے، تاہم کئی کانوں میں حفاظتی معیار محدود ہیں۔ اس کے باعث کان منہدم ہونے کے واقعات پہلے بھی پیش آتے رہے ہیں۔

امدادی کارروائیاں جاری ہیں اور مزید افراد کی تلاش کی جارہی ہے، جس کے باعث ہلاکتوں کی تعداد میں اضافے کا خدشہ موجود ہے۔