وانگ یی نے امریکا اور ایران پر زور دیا کہ وہ تنازع کے دوران تحمل اور دانش مندی کا مظاہرہ کریں
بیجنگ: چین کے وزیر خارجہ وانگ یی نے ایرانی ہم منصب عباس عراقچی سے ملاقات میں کہا ہے کہ بیجنگ ایران کے جائز حقوق اور مفادات کے تحفظ کے لیے تعاون جاری رکھنے کو تیار ہے۔
چینی وزارت خارجہ کے مطابق وانگ یی نے بدھ کو بیجنگ میں عباس عراقچی سے ملاقات کے دوران کہا کہ چین ایران کے ساتھ بات چیت اور تعاون مضبوط بنانے کے ساتھ اس کے جائز حقوق اور مفادات کا تحفظ بھی کرے گا۔
انہوں نے امریکا اور ایران پر زور دیا کہ وہ تنازع کے دوران تحمل اور دانش مندی کا مظاہرہ کریں۔
وانگ یی نے آبنائے ہرمز کو جلد از جلد دوبارہ کھولنے پر بھی زور دیا۔ انہوں نے کہا کہ تمام متعلقہ فریق مؤثر اقدامات کریں تاکہ اس اہم بحری گزرگاہ پر معمول کی آمدورفت بحال ہوسکے۔
چینی وزیر خارجہ نے امریکا اور ایران پر زور دیا کہ وہ اسلام آباد مفاہمتی یادداشت کی طرف واپس آئیں اور باہمی تشویش کے معاملات پر بامعنی مذاکرات کریں۔ چین نے اس بات پر بھی تشویش ظاہر کی کہ خطے میں جاری کشیدگی مزید یمن اور بحیرہ احمر تک نہ پھیلے۔
چین اس سے قبل بھی امریکا اور ایران کے درمیان مذاکرات کی بحالی اور کشیدگی کم کرنے کی حمایت کرچکا ہے۔ بیجنگ نے پاکستان سمیت دیگر ممالک کی سفارتی کوششوں کی بھی حمایت کا اظہار کیا ہے۔
یہ ملاقات ایسے وقت میں ہوئی ہے جب آبنائے ہرمز میں بحری آمدورفت انتہائی محدود ہے۔ تازہ اعداد و شمار کے مطابق منگل کو صرف چار بحری جہاز آبنائے ہرمز سے گزرے، جبکہ جنگ سے پہلے اس راستے سے عالمی تیل اور ایل این جی کی تقریباً پانچویں حصے کی سپلائی گزرتی تھی۔
