بجلی کی حقیقی کھپت فریج کی قسم، ماڈل، عمر، درجہ حرارت اور دیگر عوامل پر بھی منحصر ہوتی ہے
بجلی کے بڑھتے ہوئے اخراجات کے باعث گھریلو صارفین کے لیے معمولی سی بچت بھی اہم ہوگئی ہے۔ ایسے میں گھر میں استعمال ہونے والے برقی آلات کی درست دیکھ بھال بجلی کی کھپت کم کرنے میں مدد دے سکتی ہے۔ ان آلات میں فریج بھی شامل ہے، جو دن رات مسلسل چلتا رہتا ہے اور اس کی کارکردگی کا براہِ راست تعلق بجلی کے استعمال سے ہوسکتا ہے۔
مارکیٹ میں اگرچہ انورٹر ٹیکنالوجی والے فریج بھی دستیاب ہیں جو کم بجلی استعمال کرنے کا دعویٰ کرتے ہیں، تاہم فریزر کی مناسب صفائی نہ ہونے کی صورت میں بجلی کی کھپت بڑھ سکتی ہے۔ خاص طور پر فریزر کے اندر جمنے والی برف کی موٹی تہہ اس حوالے سے اہم مسئلہ بن سکتی ہے۔
عام طور پر فریزر میں برف کی تہہ کو نظرانداز کردیا جاتا ہے۔ بعض گھروں میں یہ خیال بھی پایا جاتا ہے کہ لوڈشیڈنگ کے دوران فریزر میں جمی برف اندرونی درجہ حرارت کو برقرار رکھنے میں مدد دیتی ہے۔ اگرچہ برف کچھ وقت تک ٹھنڈک برقرار رکھنے میں معاون ہوسکتی ہے، لیکن بجلی بحال ہونے کے بعد اس کا فریزر کی کارکردگی پر منفی اثر پڑنے کا امکان ہوتا ہے۔
ایک زیرو ویسٹ ایکسپرٹ نے اپنی ٹک ٹاک ویڈیو میں دعویٰ کیا کہ فریزر میں صرف دو ملی میٹر موٹی برف کی تہہ بھی بجلی کے استعمال میں 20 فیصد تک اضافہ کرسکتی ہے۔ ان کے مطابق فریزر کو برف سے صاف رکھنا بجلی کی کھپت کم کرنے کے ساتھ ساتھ فریج کی کارکردگی اور پائیداری کے لیے بھی بہتر ہے۔
ویڈیو میں ماہر نے فریزر سے برف ہٹانے کا ایک آسان طریقہ بھی بتایا۔ انہوں نے ایک برتن میں پانی گرم کیا اور اسے تقریباً 10 منٹ کے لیے فریزر کے اندر رکھ دیا، جس کے بعد جمی ہوئی برف کو نسبتاً آسانی سے کھرچ کر نکال لیا گیا۔
ماہر کے مطابق فریزر کی باقاعدگی سے صفائی اور اس میں جمی برف کو بروقت ہٹانا فریج کو بہتر حالت میں رکھنے میں مدد دے سکتا ہے۔ اس طرح ایک معمولی گھریلو دیکھ بھال نہ صرف آلے کی کارکردگی برقرار رکھنے میں معاون ہوسکتی ہے بلکہ بجلی کے غیر ضروری استعمال سے بھی بچا سکتی ہے۔
تاہم دو ملی میٹر برف سے بجلی کے استعمال میں 20 فیصد اضافے کا دعویٰ مذکورہ زیرو ویسٹ ایکسپرٹ کی جانب سے کیا گیا ہے، اسے فریج کے ہر ماڈل پر لاگو ہونے والا حتمی سائنسی اصول نہیں سمجھنا چاہیے۔ بجلی کی حقیقی کھپت فریج کی قسم، ماڈل، عمر، درجہ حرارت، سیل اور دیگر عوامل پر بھی منحصر ہوتی ہے۔
