نیپرا نے وفاقی حکومت کی منظوری کے بعد بجلی کی فی یونٹ قیمت میں اضافے کا نوٹیفکیشن جاری کردیا

حکومت نے سہ ماہی ایڈجسٹمنٹ کے تحت کراچی سمیت ملک بھر کے صارفین کے لیے بجلی مزید مہنگی کردی اور نیپرا کی جانب سے نوٹیفکیشن بھی جاری کردیا گیا۔

نیشنل الیکٹرک پاور ریگولیٹری اتھارٹی (نیپرا) کے نوٹیفکیشن کے مطابق سہ ماہی ایڈجسٹمنٹ کے تحت بجلی 52پیسے فی یونٹ مہنگی کردی گئی ہے۔

نوٹیفکیشن میں بتایا گیا کہ بجلی رواں سال کی دوسری سہ ماہی ایڈجسٹمنٹ کے تحت مہنگی کی گئی ہے، جس سے بجلی صارفین پر 12 ارب 67 کروڑ روپے کا اضافی بوجھ پڑے گا۔

مزید بتایا گیا ہے کہ بجلی صارفین سے ستمبر، اکتوبر اور نومبر کے بلوں میں مذکورہ اضافہ وصول کیا جائے گا اور صارفین سے اس دوران ہر ماہ 52 پیسے فی یونٹ اضافی وصول کیے جائیں گے۔

نیپرا کے نوٹیفکیشن میں واضح کیا گیا ہے کہ اضافے کا اطلاق کے-الیکٹرک سمیت ملک بھر کے صارفین پر ہوگا۔

نوٹیفکیشن کے مطابق نیپر ا نے نوٹیفکیشن وفاقی حکومت سے منظوری کے بعد جاری کیا ہے جبکہ اس سے قبل نیپرا نے سہ ماہی ایڈجسٹمنٹ کی منظوری دی تھی۔