زلزلہ پیما مرکز کے مطابق ریکٹر اسکیل پر گہرائی 30 کلو میٹر ریکارڈ کی گئی

صوبہ بلوچستان کے ضلع خضدار اور اس کے گردونواح میں پیر کو زلزلے کے جھٹکے محسوس کیے گئے۔

زلزلہ پیما مرکز نے تصدیق کی ہے کہ زلزلے کی شدت 4.5 ریکارڈ کی گئی جبکہ اس کی گہرائی 30 کلو میٹر تھی۔ زلزلے کا مرکز خضدار سے تقریباً 45 کلومیٹر مشرق میں واقع تھا۔

جھٹکے خضدار شہر کے ساتھ ملحقہ دیہات اور آس پاس کے علاقوں میں بھی محسوس کیے گئے، زلزلے کے فوراً بعد علاقہ مکینوں میں خوف و ہراس پھیل گیا، لوگ گھروں اور کاروباری مقامات سے باہر نکل کر کھلی جگہوں پر جمع ہو گئے، کچھ عمارتوں میں ہلکی لرزش محسوس کی گئی۔

ابتدائی اطلاعات کے مطابق کسی جانی نقصان یا بڑے پیمانے پر املاک کے نقصان کی کوئی تصدیق نہیں ہوئی۔

ضلع انتظامیہ اور پولیس نے فوری طور پر علاقے کا سروے شروع کر دیا ہے۔ ریسکیو ٹیمیں صورتحال پر نظر رکھے ہوئے ہیں۔ حکام نے بتایا کہ ابھی تک کوئی تشویشناک رپورٹ موصول نہیں ہوئی۔

ماہرین کے مطابق بلوچستان کا یہ علاقہ زلزلوں کا شکار رہتا ہے اور اس شدت کا زلزلہ عام طور پر بڑے پیمانے پر نقصان کا باعث نہیں بنتا، تاہم لوگوں کو احتیاط برتنے کی ہدایت کی جاتی ہے۔

مقامی لوگوں کا کہنا ہے کہ جھٹکے اچانک آئے اور کافی شدت سے محسوس ہوئے جس کی وجہ سے چند لمحوں کے لیے خوف کا ماحول پیدا ہوگیا۔