بچوں کی بڑھتی ہوئی عمر میں مناسب اور متوازن غذا ان کی جسمانی نشوونما اور روزمرہ سرگرمیوں کے لیے اہم ہوتی ہے
بچوں کی بڑھتی ہوئی عمر میں مناسب اور متوازن غذا ان کی جسمانی نشوونما اور روزمرہ سرگرمیوں کے لیے اہم ہوتی ہے۔ یہی وجہ ہے کہ والدین خصوصاً مائیں اکثر اس بات پر غور کرتی رہتی ہیں کہ اسکول جانے والے بچوں کے لنچ باکس میں کیا شامل کیا جائے۔
اس عمر میں بچوں میں کھانے کی عادات پیدا کرنے کے لیے بھی مناسب وقت ہوتا ہے۔ اگر شروع سے متوازن غذا کو معمول کا حصہ بنایا جائے تو بچے مختلف صحت مند غذاؤں سے مانوس ہوسکتے ہیں۔
اسکول جانے والے بچے کے لیے دن کا آغاز متوازن ناشتے سے کرنا اہم ہے۔ ناشتے میں پروٹین کے ساتھ پھل شامل کیے جاسکتے ہیں۔ تازہ موسمی پھل یا بغیر اضافی چینی کے مناسب مقدار میں پھلوں کا رس بھی ایک انتخاب ہوسکتا ہے۔
لنچ میں مختلف چیزیں رکھیں
روزانہ ایک ہی قسم کا کھانا دینے کے بجائے ہفتے بھر کے لیے لنچ باکس کا شیڈول بنایا جاسکتا ہے۔ اس میں چکن یا دیگر پروٹین ذرائع، گندم سے بنی اشیا، پھل اور سبزیاں شامل کی جاسکتی ہیں۔
اس طرح بچے کو مختلف غذائی اجزا بھی ملتے رہیں گے اور وہ ایک ہی کھانے سے اکتا بھی نہیں جائے گا۔
گھر کے بنے اسنیکس بہتر انتخاب
لنچ باکس میں گھر کے تیار کردہ اسنیکس کو ترجیح دی جاسکتی ہے۔ پھل، دہی یا گھر میں تیار کیے گئے گرینولا بار اس کی مثالیں ہیں۔ اس سے بچوں کو ضرورت سے زیادہ پروسیسڈ اسنیکس دینے سے بچنے میں مدد مل سکتی ہے۔
بچوں کو ہائیڈریٹ رکھنے کے لیے پانی کو ان کی روزمرہ خوراک کا اہم حصہ بنانا چاہیے۔ سوڈا اور ضرورت سے زیادہ میٹھے مشروبات کے بجائے پانی کو ترجیح دینا بہتر ہے۔
بچوں کی پانی کی ضرورت عمر، موسم، جسمانی سرگرمی اور دیگر عوامل کے مطابق مختلف ہوسکتی ہے، تاہم دی گئی تجاویز میں اسکول جانے والے بچے کے لیے روزانہ تقریباً ایک سے ڈیڑھ لیٹر پانی یقینی بنانے کا مشورہ دیا گیا ہے۔
رنگ برنگے پھل اور سبزیاں شامل کریں
لنچ باکس میں مختلف رنگوں کے پھل اور سبزیاں شامل کرنے سے بچے کو مختلف وٹامنز اور معدنیات فراہم کرنے میں مدد مل سکتی ہے۔ سبزیوں اور پھلوں میں تنوع رکھنے سے بچے کی غذا بھی زیادہ متوازن ہوسکتی ہے۔
میٹھے اور پروسیسڈ کھانوں میں اعتدال
کبھی کبھار پروسیسڈ فوڈ دینا مسئلہ نہیں، لیکن اسے روزمرہ غذا کا بنیادی حصہ بنانے سے گریز کرنا چاہیے۔ بہت زیادہ میٹھے اور پروسیسڈ کھانے اکثر زیادہ کیلوریز فراہم کرتے ہیں جبکہ ان میں ضروری غذائی اجزا نسبتاً کم ہوسکتے ہیں۔
بچے کو منصوبہ بندی میں شامل کریں
ہفتہ وار لنچ کی منصوبہ بندی کرتے وقت بچے کو بھی اس عمل میں شامل کرنا فائدہ مند ہوسکتا ہے۔ اس سے والدین کو بچے کی پسند اور ناپسند سمجھنے میں مدد ملے گی اور بچہ بھی اپنے کھانے کے انتخاب میں دلچسپی لے گا۔
اس طرح لنچ باکس کی تیاری صرف والدین کی ذمہ داری نہیں رہے گی بلکہ بچے کو بھی صحت مند کھانے کی عادات اپنانے کے عمل کا حصہ بنایا جاسکے گا۔
