پیٹرولیم جیلی جلد کی سطح پر ایک حفاظتی تہہ بنا کر نمی کے ضیاع کو کم کرتی ہے

سردیوں یا خشک موسم میں چہرے کی جلد اکثر کھنچی کھنچی اور بے رونق محسوس ہونے لگتی ہے، ایسے میں پیٹرولیم جیلی جلد کی نمی برقرار رکھنے کا ایک سادہ اور کم قیمت طریقہ ہو سکتی ہے۔

پیٹرولیم جیلی خود جلد کو پانی فراہم نہیں کرتی بلکہ جلد کی سطح پر ایک حفاظتی تہہ بنا کر نمی کے ضیاع کو کم کرتی ہے، اسی لیے اسے خصوصاً خشک جلد اور خشک حصوں کیلئے استعمال کیا جاتا ہے۔

خشک جلد کو نرم رکھنے میں مدد کرتی ہے

خشک ہوا، سرد موسم یا بار بار چہرہ دھونے سے جلد کی نمی کم ہو سکتی ہے۔ ایسی صورت میں نم جلد پر پیٹرولیم جیلی کی بہت باریک تہہ لگانے سے نمی کو برقرار رکھنے میں مدد مل سکتی ہے۔

رات کو چہرہ صاف کرنے اور موئسچرائزر لگانے کے بعد خشک حصوں پر تھوڑی سی پیٹرولیم جیلی لگائی جا سکتی ہے۔

پیٹرولیم جیلی ہونٹوں پر حفاظتی تہہ بناتی ہے، جس سے نمی جلدی ضائع نہیں ہوتی اور خشک یا پھٹے ہوئے ہونٹ نرم رہنے میں مدد ملتی ہے۔

بھنووں کو سیٹ کرنے کا آسان طریقہ

پیٹرولیم جیلی صرف اسکن کیئر تک محدود نہیں، اس کی معمولی مقدار بھنووں کے بالوں کو اپنی جگہ رکھنے کیلئے بھی استعمال کی جا سکتی ہے۔

پیٹرولیم جیلی لگانے کا صحیح طریقہ

چہرہ کسی ہلکے کلینزر سے صاف کریں اور جلد کو تھوڑا نم رہنے دیں۔ پہلے اپنا معمول کا موئسچرائزر لگایا جا سکتا ہے اور اس کے بعد صرف تھوڑی سی پیٹرولیم جیلی خشک حصوں پر باریک تہہ کی صورت میں لگائیں۔

اگر جلد پر انفیکشن، شدید جلن یا کوئی خاص جلدی بیماری موجود ہو تو گھریلو طریقوں کے بجائے ماہرِ جلد سے مشورہ کرنا زیادہ مناسب ہے۔