دونوں کو فلم ’ہنومان انش‘ کے سیکوئل میں مختصر کرداروں کے لیے شامل کیے جانے پر غور کیا جا رہا ہے
بالی ووڈ کی مقبول جوڑی انوشکا شرما اور بھارتی کرکٹر ویرات کوہلی کے مداحوں کے لیے ایک دلچسپ خبر سامنے آئی ہے، تاہم فی الحال یہ صرف ممکنہ شرکت تک محدود ہے۔
بھارتی میڈیا رپورٹس کے مطابق دونوں کو فلم ’ہنومان انش‘ کے سیکوئل میں مختصر کرداروں کے لیے شامل کیے جانے پر غور کیا جا رہا ہے۔ فلم کی شریک پروڈیوسر نمرا سنگھ نے بتایا ہے کہ پروڈکشن ٹیم نے کئی معروف شخصیات سے رابطہ کیا ہے، جن میں ویرات کوہلی اور انوشکا شرما بھی شامل ہیں۔
رپورٹس میں یہ بھی کہا گیا ہے کہ اگر دونوں فلم کا حصہ بنتے ہیں تو ان کی شرکت کو نیم کروڑی بابا سے عقیدت کے تناظر میں کہانی کا حصہ بنایا جاسکتا ہے۔
’ہنومان انش‘ نیم کروڑی بابا کی زندگی پر مبنی فلم ہے۔ فلم کو ملنے والی کامیابی کے بعد اسے تین حصوں پر مشتمل سیریز میں تبدیل کرنے کا منصوبہ بنایا گیا ہے۔
اگر انوشکا اور ویرات کی فلم میں شرکت حتمی ہوجاتی ہے تو یہ پہلی مرتبہ ہوگا کہ دونوں میاں بیوی کسی فلم میں ایک ساتھ نظر آئیں گے، جس کا مداحوں کو یقیناً بے صبری سے انتظار ہوگا۔
