بروقت صاف نہ کیا جائے تو ٹائلز کی سطح چپچپی اور بدنما ہونے کے ساتھ صفائی کا مسئلہ بھی پیدا ہوسکتا ہے
باورچی خانے میں کھانا پکاتے ہوئے تیل اور مختلف غذاؤں کے ذرات ٹائلوں، فرش اور جوڑوں پر جم جاتے ہیں۔ اگر انہیں بروقت صاف نہ کیا جائے تو سطح چپچپی اور بدنما ہونے کے ساتھ صفائی کے حوالے سے بھی مسئلہ پیدا کرسکتی ہے۔
روزمرہ صفائی کے لیے ٹائلوں کو مناسب صفائی محلول میں نم کیے گئے کپڑے سے صاف کیا جاسکتا ہے۔ اس عمل سے سطح پر جمع ہونے والی عام گندگی اور کھانے کے نشانات دور ہوجاتے ہیں۔ ضدی باقیات کے لیے قدرے موٹے مائیکرو فائبر کپڑے کا استعمال بھی کیا جاسکتا ہے۔
اگر ٹائلوں پر چکنائی کی تہہ جم گئی ہو تو بیکنگ سوڈا اور پانی ملا کر پیسٹ بنایا جاسکتا ہے۔ اس پیسٹ کو چکنی جگہ پر لگا کر صفائی کی جائے اور پھر صاف کپڑے سے باقیات ہٹا دی جائیں۔ آخر میں مائیکرو فائبر کپڑے سے ٹائل کو اچھی طرح پونچھنے سے سطح پر موجود دھبے اور لکیریں کم کی جاسکتی ہیں۔
ٹائلوں کے درمیان موجود گراؤٹ کی صفائی بھی کچن کی مجموعی صفائی کے لیے اہم ہے۔ چمکدار ٹائلیں اس وقت بھی خراب دکھائی دیتی ہیں جب ان کے درمیان موجود جوڑ گندے یا بے رنگ ہوں۔
سفید گراؤٹ کے لیے پانی میں مناسب مقدار میں بلیچ ملا کر پرانے ٹوتھ برش کی مدد سے جوڑوں کو رگڑا جاسکتا ہے۔ صفائی مکمل ہونے کے بعد سادہ پانی سے جگہ کو اچھی طرح دھونا ضروری ہے۔
رنگین گراؤٹ پر بلیچ استعمال کرنے سے پہلے کسی چھپی ہوئی یا غیر نمایاں جگہ پر تجربہ کرنا بہتر ہے، کیونکہ بلیچ رنگ کو متاثر کرسکتا ہے۔ اگر بلیچ سے رنگ خراب ہونے کا خدشہ ہو تو ڈسٹلڈ سفید سرکہ یا سفید ٹوتھ پیسٹ کو متبادل کے طور پر آزمایا جاسکتا ہے۔
صفائی کے کسی بھی طریقے کے بعد ٹائلوں اور گراؤٹ کو صاف پانی میں بھیگے کپڑے سے اچھی طرح پونچھ کر خشک کرلینا چاہیے تاکہ صفائی کا محلول سطح پر باقی نہ رہے۔
