اداکار ان دنوں اپنی نئی فلم ’رنی اینڈ ایما‘ کی تشہیر بھی کر رہے ہیں
ہالی ووڈ کی معروف ہارر فلم سیریز ’ایول ڈیڈ‘ سے شہرت حاصل کرنے والے اداکار بروس کیمبل نے کینسر کی تشخیص کے بعد اپنی صحت سے متعلق تشویشناک انکشاف کرتے ہوئے بتایا ہے کہ موجودہ اندازوں کے مطابق ان کے پاس تقریباً 5 سال ہیں۔
67 سالہ اداکار نے ’دی ایڈم کیرولا شو‘ میں گفتگو کرتے ہوئے بتایا کہ وہ کس قسم کے کینسر میں مبتلا ہیں، اس کی تفصیلات فی الحال عوام کے سامنے نہیں لانا چاہتے۔
بروس کیمبل نے کہا کہ ’’مجھے جس قسم کا کینسر ہے، موجودہ صورتحال میں اس کے ساتھ تقریباً پانچ سال کا وقت بتایا گیا ہے، کچھ کم یا زیادہ ہو سکتا ہے۔‘‘
View this post on Instagram
تاہم اداکار نے واضح کیا کہ وہ اپنی بیماری کو زندگی پر حاوی نہیں ہونے دینا چاہتے۔ انہوں نے کہا کہ ’’میں نے فیصلہ کیا ہے کہ میں اس بیماری کے ساتھ جینا چاہتا ہوں، اس سے مرنا نہیں۔‘‘
بروس کیمبل نے مزید بتایا کہ وہ کینسر سے متعلق انٹرنیٹ پر موجود بے شمار معلومات اور مریضوں کے تجربات میں الجھنے کے بجائے اپنی زندگی معمول کے مطابق جاری رکھنے کو ترجیح دے رہے ہیں۔
اداکار ان دنوں اپنی نئی فلم ’رنی اینڈ ایما‘ کی تشہیر بھی کر رہے ہیں اور ان کا کہنا ہے کہ بیماری کے باوجود وہ اپنی پیشہ ورانہ اور ذاتی زندگی مکمل طور پر روکنا نہیں چاہتے۔
