رواں افزائشِ نسل کے موسم میں تقریباً 350 وہیل کے بچے ہلاک ہو چکے ہیں

ارجنٹائن کے جنوبی علاقے پیٹاگونیا میں واقع جزیرہ نما والڈیز کے ساحل پر جنوبی رائٹ وہیل کے بچوں کی غیر معمولی تعداد میں ہلاکت نے ماہرین کو تشویش میں مبتلا کر دیا ہے۔

تازہ اندازوں کے مطابق رواں افزائشِ نسل کے موسم میں تقریباً 350 وہیل کے بچے ہلاک ہو چکے ہیں، جو اس علاقے میں معمول سے کہیں زیادہ اموات ہیں۔

یہ اموات جون سے رپورٹ ہونا شروع ہوئی تھیں اور حالیہ ہفتوں میں ان میں نمایاں اضافہ ہوا۔ تاہم ماہرین نے خبردار کیا ہے کہ حتمی تعداد ابھی سامنے نہیں آئی، کیونکہ وہیلوں کی افزائش کا موسم نومبر کے آخر تک جاری رہتا ہے۔

تحقیقات میں فی الحال ایک بیکٹیریائی انفیکشن کو اہم ممکنہ وجہ سمجھا جا رہا ہے۔ سائنس دانوں کے مطابق kelp gulls نامی سمندری پرندے وہیل کے بچوں کی جلد اور چربی کو نوچتے ہیں، جس سے زخم پیدا ہو سکتے ہیں اور انہی زخموں کے ذریعے نقصان دہ بیکٹیریا جسم میں داخل ہونے کا امکان ہے۔ تاہم ابھی تک یہ ثابت نہیں ہوا کہ یہی واحد وجہ ہے۔

سائنس دان سمندری پانی کے درجہ حرارت، ماحولیاتی تبدیلی، خوراک کی دستیابی اور انسانی سرگرمیوں سمیت دیگر عوامل کا بھی جائزہ لے رہے ہیں۔ مردہ وہیلوں کے جسم سے حاصل کیے گئے نمونوں کو لیبارٹری میں جانچا جا رہا ہے تاکہ اصل وجہ معلوم کی جا سکے۔