ہائیکورٹ نے تھانہ ہمک کے ایس ایچ او کو آئندہ سماعت پر ذاتی حیثیت میں بھی طلب کر لیا

اسلام آباد ہائیکورٹ نے لیڈی ڈاکٹر کے گھر پر قبضے کی کوشش کے دوران ہراساں کرنے کے خلاف کیس میں ڈاکٹر اور ان کے اہلخانہ کو تحفظ فراہم کرنے کا حکم دے دیا۔

عدالت نے آئی جی اسلام آباد، ایس ایس پی اور متعلقہ ایس ایچ او کو ڈاکٹر نزہت شاکر اور ان کے اہلخانہ کی حفاظت یقینی بنانے کی ہدایت کی جبکہ فریقین سے جواب بھی طلب کرلیا گیا۔

جسٹس خادم سومرو نے ڈاکٹر نزہت شاکر کی درخواست پر سماعت کا حکم نامہ جاری کر دیا۔

عدالت نے حکم دیا کہ پولیس حکام درخواست گزار اور اہلخانہ کو تحفظ فراہم کریں، ڈاکٹر نزہت شاکر کو مناسب سیکیورٹی فراہم کی جائے۔

ہائیکورٹ نے تھانہ ہمک کے ایس ایچ او کو آئندہ سماعت پر ذاتی حیثیت اور درخواست گزار کے تحفظ سے متعلق اقدامات پر مبنی تعمیلی رپورٹ بھی طلب کرلی۔ عدالت نے ہدایت کی کہ پولیس اور مقامی انتظامیہ درخواست گزار کی جائیداد اور ذاتی تحفظ یقینی بنائیں۔

عدالت نے کیس کی سماعت 13 اکتوبر تک ملتوی کر دی۔ ڈاکٹر نزہت شاکر نے گھر پر قبضے کی کوشش کے دوران ہراساں کیے جانے کے خلاف عدالت سے رجوع کر رکھا ہے۔