شہری نے ڈاکوؤں کا پیچھا کیا اور راستے میں تیموریہ تھانے کی شاہین فورس کو ڈاکوؤں سے آگاہ کیا

نارتھ کراچی میں تیموریہ پولیس کی شاہین فورس کے جوانوں نے طویل تعاقب کے بعد خواجہ اجمیر نگری میں دوطرفہ فائرنگ کے تبادلے میں 3 ڈاکوؤں کو ہلاک کر دیا۔

آئی جی سندھ نے ڈی آئی جی ویسٹ زون عرفان علی بلوچ سمیت دیگر پولیس افسران اور شاہین فورس کے جوانوں کو شاباش دی ہے ، مارے جانے والے تینوں ڈاکو عزیز آباد کے علاقے حسین آباد میں شہری سے نقدی اور موبائل فون چھین کر فرار ہوئے تھے ۔

شہری نے ڈاکوؤں کا پیچھا کیا اور راستے میں تیموریہ تھانے کی شاہین فورس کو ڈاکوؤں سے آگاہ کیا جس نے تعاقب کے بعد مقابلے کے دوران تینوں ڈاکوؤں کو ہلاک کر دیا۔

اس حوالے سے ترجمان ڈسٹرکٹ سینٹرل پولیس کے مطابق شاہین فورس تیموریہ تھانے کے جوانوں کا خواجہ اجمیر نگری کے علاقے سیکٹر فائیو بی تھری اسٹار لان کے قریب موٹر سائیکل سوار ڈاکوؤں سے مقابلہ ہوا اور دوطرفہ فائرنگ کے تبادلے میں تینوں ڈاکو ہلاک ہوگئے۔

ایس ایچ او تیموریہ ثاقب خان نے بتایا کہ شاہین فورس کے جوانوں نے شہری کی نشاندہی پر ڈاکوؤں کا تعاقب اور اس دوران وہ خواجہ اجمیر نگری کی حدود میں پہنچ گئے جبکہ ایس ایچ او خواجہ اجمیر نگری فرخ ہاشمی نے بتایا کہ ان کے تھانے سے بھی شاہین فورس کے جوان موقع پر پہنچ گئے اور مشترکہ مقابلے کے دوران تینوں ڈاکوؤں کو ہلاک کر دیا جو کہ 2 موٹر سائیکلوں پر سوار تھے۔

پولیس نے ڈاکوؤں کے قبضے سے 2 پستول ، گولیاں ، چھینی گئی نقدی اور موبائل فون برآمد کرلیے ، پولیس نے جائے وقوعہ سے شواہد حاصل کرنے کے بعد مارے جانے والے ڈاکوؤں میں ایک عمر رسیدہ ڈاکو بھی شامل ہے، پولیس نے تینوں ڈاکوؤں کی لاشوں کو ضابطے کی کارروائی کے لیے عباسی شہید اسپتال منتقل کر دیا جہاں ان کی شناخت عمل جاری ہے۔

ایس ایچ او خواجہ اجمیر نگری فرخ ہاشمی اور ایس ایچ او تیموریہ ثاقب خان نے مقابلے میں حصہ لینے والے شاہین فورس کے جوانوں میں نقد انعام بھی تقسیم کیے۔