اس سلسلے میں بورڈ آف ریونیو پنجاب کے تحت پنجاب لیکویڈیشن کمیٹی کے زیرِ اہتمام چیکوں کی تقسیم کی خصوصی تقریب منعقد ہوئی، جس میں لیکویڈیشن کمیٹی کے چیئرمین و ممبر کالونیز ملک عبدالوحید اور سیکرٹری کالونیز ڈیپارٹمنٹ ظہیر عباس جٹھ نے متاثرین میں چیک تقسیم کیے۔

پہلے مرحلے میں 31 متاثرین کو چیک دیے گئے، جبکہ دوسرے مرحلے میں 50 اور تیسرے مرحلے میں 100 متاثرین کو ادائیگی کی جائے گی۔

تقریب سے خطاب کرتے ہوئے ملک عبدالوحید نے کہا کہ کالعدم فنانس کارپوریشنز کے متاثرین کی مجموعی تعداد 2 لاکھ 46 ہزار 771 تھی۔ ان متاثرین کو اب تک 13 ارب روپے ادا کیے جا چکے ہیں، جبکہ تقریباً 6 ہزار ایسے متاثرین باقی ہیں جنہیں ادائیگی کی جانی ہے۔

ان کی رقوم کی ادائیگی کے لیے اقدامات شروع کر دیے گئے ہیں اور اس عمل کو مرحلہ وار آگے بڑھایا جا رہا ہے۔ ملک عبدالوحید نے کہا کہ باقی ماندہ متاثرین تک پہنچنے کے لیے اخبارات میں تشہیر کی گئی ہے اور ذرائع ابلاغ کا تعاون بھی حاصل کیا جا رہا ہے۔

جن متاثرین کی رقوم یا منافع کی ادائیگی ابھی باقی ہے، وہ فوری طور پر لیکویڈیشن کمیٹی سے رابطہ کریں تاکہ ان کے واجبات کی تصدیق اور ادائیگی کا عمل جلد مکمل کیا جا سکے۔

انہوں نے کہا کہ بورڈ آف ریونیو پنجاب متاثرین کو ان کی واجب الادا رقوم کی ادائیگی کے لیے مرحلہ وار اقدامات کر رہا ہے۔ متعلقہ ریکارڈ کی جانچ پڑتال اور حساب کتاب کے بعد باقی ماندہ ادائیگیوں کو آگے بڑھایا جائے گا تاکہ طویل عرصے سے اپنے واجبات کے منتظر افراد کو ریلیف فراہم کیا جا سکے۔

ملک عبدالوحید نے بورڈ آف ریونیو پنجاب میں ادارہ جاتی انضمام کے حوالے سے گفتگو کرتے ہوئے بتایا کہ پی سی بی ایل اکتوبر 2025ء میں بورڈ آف ریونیو پنجاب میں ضم ہوا۔

ان کے مطابق انضمام کے بعد ابتدائی چند ماہ کے دوران قبضہ گروپوں کے خلاف کامیاب کارروائیاں کی گئیں اور تقریباً 9 ارب روپے مالیت کی جائیدادیں قبضہ گروپوں سے واگزار کرائی گئیں۔ انہوں نے کہا کہ غیر قانونی قبضوں کے خلاف کارروائیوں کا سلسلہ اب بھی جاری ہے۔

انہوں نے مزید کہا کہ بورڈ آف ریونیو پنجاب کی جانب سے متاثرین کے واجبات کی ادائیگی اور سرکاری املاک کو قبضہ گروپوں سے واگزار کرانے کے لیے اقدامات جاری رہیں گے۔

متاثرین سے اپیل کی گئی ہے کہ جن افراد کے واجبات اب تک ادا نہیں ہوئے، وہ متعلقہ کمیٹی سے رابطہ کریں تاکہ ان کے معاملات کو ریکارڈ کے مطابق نمٹایا جا سکے۔

واضح رہے کہ چیکوں کی تقسیم کا موجودہ مرحلہ ان متاثرین کو ادائیگیوں کی فراہمی کی کوششوں کا حصہ ہے جن کے واجبات تاحال باقی ہیں۔

متعلقہ حکام کے مطابق باقی ماندہ متاثرین تک رسائی، واجبات کی تصدیق اور ادائیگیوں کی تکمیل کے لیے ذرائع ابلاغ کے ذریعے آگاہی مہم بھی جاری ہے۔