اسلام آباد ایئرپورٹ پاکستان کا پہلا اور واحد ایئرپورٹ ہے جہاں اس نوعیت کی خصوصی سہولت متعارف کرائی گئی ہے۔ اس اقدام کا بنیادی مقصد خصوصی ضروریات رکھنے والے مسافروں کے لیے ہوائی سفر کو زیادہ آسان، پُرسکون اور باوقار بنانا ہے۔

سن فلاور لین یارڈ ایک مخصوص علامتی پٹا ہے جس پر سورج مکھی کے پھولوں کا نشان بنا ہوتا ہے۔ اس پٹے کو استعمال کرنے والے مسافروں کو ایئرپورٹ کا عملہ اضافی معاونت، رہنمائی، وقت اور صبر کی ضرورت رکھنے والے افراد کے طور پر پہچان سکتا ہے۔

یہ سہولت بالخصوص آٹزم کے شکار بچوں، حسی مشکلات اور دیگر پوشیدہ معذوریوں کے حامل افراد اور ان کے اہل خانہ کے لیے انتہائی اہمیت کی حامل ہے۔ ایئرپورٹ پر شور، رش اور طویل قطاریں خصوصی بچوں کے لیے ذہنی دباؤ کا سبب بن سکتی ہیں، ایسے حالات میں عملے کا تعاون ان کے سفر کو آسان بنا سکتا ہے۔

اس اہم اقدام کے پس منظر میں اسلام آباد انٹرنیشنل ایئرپورٹ کے منیجر اور آپریٹنگ آفیسر آفتاب گیلانی کا وژن، پیشہ ورانہ صلاحیت اور انسانیت سے محبت نمایاں ہے۔ ان کی سوچ اس حقیقت کی عکاس ہے کہ ایک کامیاب ادارہ وہی ہوتا ہے جو انتظامی امور کی انجام دہی کے ساتھ ساتھ عوام کی ضروریات کو بھی سمجھے۔

اس کامیابی میں سیکریٹری دفاع لیفٹیننٹ جنرل (ر) محمد علی، ہلالِ امتیاز (ملٹری) کی سرپرستی اور ادارہ جاتی تعاون کو بھی کلیدی حیثیت حاصل ہے۔ اعلیٰ قیادت کی حوصلہ افزائی اور افسران کو کام کرنے کے مواقع فراہم کرنا ہی اداروں کی ترقی کے لیے بنیادی اہمیت رکھتا ہے۔

سیکریٹری دفاع کا کہنا ہے کہ ایک ذہین، محبِ وطن اور پیشہ ورانہ صلاحیتوں کا حامل افسر ہی اپنے ادارے کو ترقی دے سکتا ہے اور ملک کا نام بلند کرنے میں مؤثر کردار ادا کر سکتا ہے۔ ان کے مطابق اسلام آباد ایئرپورٹ اپنی خدمات اور مثبت اقدامات کے ذریعے دنیا میں اپنی شناخت قائم کر رہا ہے۔

آفتاب گیلانی کی کوششیں اس امر کی مثال ہیں کہ جب کسی افسر میں ادارے کی بہتری اور انسانیت کی خدمت کا جذبہ موجود ہو تو وہ اپنے منصب کو محض انتظامی ذمہ داری نہیں بلکہ عوامی خدمت کا ذریعہ بنا سکتا ہے۔

اس پروگرام کی کامیابی کے لیے عملے کی مناسب تربیت، مؤثر رہنمائی اور مسلسل تعاون کو یقینی بنایا جا رہا ہے تاکہ خصوصی ضروریات کے حامل مسافر حقیقی معنوں میں اس سہولت سے مستفید ہو سکیں۔

یہ اقدام اس پیغام کو مضبوط کرتا ہے کہ کسی ادارے کی حقیقی کامیابی صرف جدید سہولیات اور انتظامی کارکردگی میں نہیں بلکہ اس کے انسانی رویے، عوامی خدمت اور خصوصی افراد کے لیے آسانیاں پیدا کرنے کے جذبے میں بھی پوشیدہ ہوتی ہے۔

اسلام آباد انٹرنیشنل ایئرپورٹ کا یہ قدم ایک ایسے پاکستان کی تصویر پیش کرتا ہے جہاں خصوصی بچوں اور معذور افراد کو عزت، احترام اور سہولت فراہم کرنا ادارہ جاتی ترجیحات کا حصہ ہے۔