اسحاق ڈار نے عالمی سطح پر بڑھتی ہوئی کشیدگی اور بڑی طاقتوں کے درمیان مسابقت پر تشویش کا اظہار کرتے ہوئے کہا کہ پاکستان تنازعات کے پرامن حل اور کثیرالجہتی تعاون پر یقین رکھتا ہے۔ انہوں نے واضح کیا کہ پاکستان امن کا خواہاں ہے تاہم اپنی خودمختاری کے دفاع کیلئے پوری قوت سے اقدامات کرے گا۔

کشمیر کے دیرینہ تنازعہ پر بات کرتے ہوئے نائب وزیراعظم نے کہا کہ خطے میں پائیدار امن کیلئے اقوام متحدہ کی سلامتی کونسل کی متعلقہ قراردادوں کے مطابق مسئلہ کشمیر کا منصفانہ حل ناگزیر ہے۔ انہوں نے پانی کو بطور ہتھیار استعمال کرنے کی کوششوں کے خلاف خبردار کرتے ہوئے سندھ طاس معاہدے کے تحت پاکستان کے حقوق کے تحفظ کے عزم کا اعادہ کیا۔

افغانستان کی صورتحال پر گفتگو کرتے ہوئے انہوں نے کہا کہ افغان سرزمین کا استعمال کسی دوسرے ملک بالخصوص پاکستان کے خلاف دہشت گردانہ سرگرمیوں کیلئے نہیں ہونا چاہیے۔ انہوں نے کہا کہ پاکستان ایک پرامن، مستحکم اور معاشی طور پر مربوط افغانستان کی حمایت کرتا ہے اور اپنے عوام کے تحفظ کیلئے اقدامات جاری رکھے گا۔

نائب وزیراعظم نے مشرق وسطیٰ میں امن کیلئے پاکستان کے کردار کو اجاگر کرتے ہوئے کہا کہ پاکستان نے امریکہ اور ایران کے درمیان اسلام آباد مذاکرات میں سہولت کاری فراہم کی ہے۔ انہوں نے چین کے ساتھ قریبی رابطہ کاری اور خلیجی ممالک کے ساتھ مل کر امن و استحکام کیلئے کی جانے والی کوششوں کا بھی ذکر کیا۔

انہوں نے سعودی عرب اور ترکیہ کے ساتھ مکہ مشترکہ دفاعی معاہدے کا حوالہ دیتے ہوئے اسے اجتماعی سلامتی اور قابل اعتماد دفاعی صلاحیت کو مضبوط بنانے کا ذریعہ قرار دیا۔ اسحاق ڈار نے کہا کہ یہ دفاعی انتظام کسی مخصوص ملک کو ہدف بنانے کیلئے نہیں ہے۔

معاشی محاذ پر بات کرتے ہوئے انہوں نے کہا کہ پاکستان کی خارجہ پالیسی میں معاشی سفارت کاری کو مرکزی حیثیت حاصل ہے۔ انہوں نے زور دیا کہ برآمدات کی منڈیوں کو وسعت دینے، پیداواری سرمایہ کاری کو راغب کرنے اور ٹیکنالوجی کے شعبے میں تعاون سے ہی عوام کے معیار زندگی کو بہتر بنایا جا سکتا ہے۔

اسحاق ڈار نے عالمی برادری پر زور دیا کہ وہ گلوبل ساؤتھ کی ترقیاتی ضروریات کو پورا کرنے کیلئے مالی وسائل اور جدید ٹیکنالوجی تک منصفانہ رسائی کو یقینی بنائے۔ انہوں نے کہا کہ عالمی غیر یقینی صورتحال سے نمٹنے کیلئے پاکستان اپنی معیشت، اداروں اور تکنیکی صلاحیتوں کو مضبوط بنا رہا ہے۔

تقریب کے دوران انہوں نے مئی 2025 میں بھارت کی جارحیت کے جواب میں 'آپریشن بنی ان مرصوص' کا ذکر کرتے ہوئے مسلح افواج کی پیشہ ورانہ مہارت کو خراج تحسین پیش کیا۔ انہوں نے کہا کہ یہ آپریشن پاکستان کی قومی خودمختاری کے دفاع کے عزم اور صلاحیت کا مظہر تھا۔

مارگلہ ڈائیلاگ 2026 میں اسلام آباد پالیسی ریسرچ انسٹی ٹیوٹ کے صدر لیفٹیننٹ جنرل (ر) ماجد احسان، غیر ملکی سفیروں اور دیگر اہم شخصیات نے شرکت کی۔

وزیر خزانہ نے بتایا کہ ہدفی سبسڈی کے تحت اب تک موٹر سائیکلوں، تین پہیوں والی گاڑیوں اور 800 سی سی سے کم انجن کی حامل گاڑیوں کے مالکان کو ریلیف فراہم کیا گیا ہے۔ اس پروگرام سے اب تک ایک کروڑ 20 لاکھ افراد براہ راست فائدہ اٹھا چکے ہیں جبکہ مجموعی طور پر چار سے پانچ کروڑ پاکستانی شہری اس سے مستفید ہو رہے ہیں۔

ملک کی معاشی صورتحال پر روشنی ڈالتے ہوئے محمد اورنگزیب نے کہا کہ پاکستان کی آئی ٹی برآمدات میں نمایاں اضافہ ہوا ہے جو ایک ارب ڈالر سے بڑھ کر 4.6 ارب ڈالر تک پہنچ گئی ہیں۔ رواں مالی سال کے دوران ان برآمدات کے 5.5 ارب ڈالر تک پہنچنے کی توقع ہے، جو ملکی معیشت کے لیے ایک مثبت پیش رفت ہے۔

انہوں نے مزید کہا کہ پاکستان کے زرمبادلہ کے ذخائر ملکی تاریخ کی بلند ترین سطح پر موجود ہیں، جو تین ماہ سے زائد کی درآمدات کے لیے کافی ہیں۔ ماضی میں یہ ذخائر صرف دو ہفتوں کی درآمدات تک محدود رہ گئے تھے، جس سے ملکی معیشت پر دباؤ بڑھ گیا تھا۔

وزیر خزانہ نے کریڈٹ ریٹنگ میں بہتری کا ذکر کرتے ہوئے کہا کہ گزشتہ سال اپریل سے اب تک پاکستان کی کریڈٹ ریٹنگ میں تین مرتبہ بہتری آئی ہے۔ عالمی مالیاتی منڈیوں تک رسائی کے لیے حکومت نے پرائیویٹ پلیسمنٹ اور پانڈا بانڈز کے اجرا جیسے اہم اقدامات کیے ہیں جنہیں عالمی سرمایہ کاروں نے سراہا ہے۔

انہوں نے بتایا کہ ستمبر کے پہلے ہفتے میں جاری کیے گئے تین ارب یورو کے بانڈز کے لیے سرمایہ کاروں کی جانب سے موصول ہونے والے آرڈرز جاری کردہ حجم سے دو گنا تھے۔ ایشیا، مشرق وسطیٰ، یورپ اور امریکا کے سرمایہ کاروں کی پاکستان کے بانڈز میں دلچسپی اس بات کا ثبوت ہے کہ عالمی برادری پاکستان کی معاشی پالیسیوں پر اعتماد کر رہی ہے۔

توانائی کے شعبے کے حوالے سے وزیر خزانہ نے کہا کہ علاقائی تنازعات کے باوجود پاکستان نے توانائی کی خریداری اور فراہمی کو یقینی بنانے کے لیے مؤثر اقدامات کیے ہیں۔ نومبر تک توانائی کی ضروریات پوری کرنے کے لیے مناسب انتظامات مکمل کر لیے گئے ہیں جبکہ موسم سرما کے لیے بھی منصوبہ بندی جاری ہے۔

محمد اورنگزیب نے واضح کیا کہ پاکستان میں توانائی کی قلت پیدا نہیں ہونے دی گئی اور نہ ہی پیٹرول پمپس پر ایندھن کے حصول کے لیے قطاریں لگیں۔ انہوں نے کہا کہ توانائی کے بحران کے باعث امن و امان کی صورتحال خراب نہیں ہوئی، جو حکومت کی کامیاب حکمت عملی کا نتیجہ ہے۔

وزیر خزانہ نے اپنے خطاب میں اس بات پر زور دیا کہ معاشی اصلاحات اب محض کاغذوں یا منصوبہ بندی کے مرحلے میں نہیں بلکہ عملی شکل اختیار کر چکی ہیں۔ ان کا کہنا تھا کہ حکومت آئی ایم ایف پروگرام کے تحت طے شدہ اہداف پر عمل پیرا ہے اور آئندہ سال اکتوبر تک یہ پروگرام مکمل ہو جائے گا۔

انہوں نے کہا کہ عالمی سرمایہ کار اب آئی ایم ایف پروگرام کے بعد پاکستان کی معاشی صورتحال کو بھی بغور دیکھ رہے ہیں۔ حکومت کی جانب سے ساختی اصلاحات کا تسلسل ملک کو طویل مدتی معاشی استحکام کی جانب لے جانے کے لیے ناگزیر ہے۔

تقریب کے شرکاء سے گفتگو کرتے ہوئے انہوں نے کہا کہ پاکستان کی معیشت اب درست سمت میں گامزن ہے اور حکومت کی ترجیح عوام کو ریلیف فراہم کرنے کے ساتھ ساتھ ملکی برآمدات میں اضافہ کرنا ہے۔ ان کا کہنا تھا کہ معاشی استحکام کے لیے سخت فیصلے کرنا ضروری تھے تاکہ ملک کو بحرانوں سے نکالا جا سکے۔

وزیر خزانہ نے مزید کہا کہ حکومت نے معیشت کی بہتری کے لیے جو روڈ میپ تیار کیا تھا، اس پر عمل درآمد جاری ہے۔ انہوں نے امید ظاہر کی کہ آنے والے وقتوں میں پاکستان کی معاشی ترقی کی رفتار میں مزید تیزی آئے گی اور عوام کو معاشی فوائد حاصل ہوں گے۔

آخر میں انہوں نے کہا کہ پاکستان کے پاس وسائل کی کمی نہیں ہے، ضرورت صرف ان وسائل کے درست استعمال اور شفاف نظام کی ہے۔ حکومت کا عزم ہے کہ وہ معاشی اصلاحات کے عمل کو جاری رکھے گی تاکہ ملک کو خود کفیل بنایا جا سکے۔