برسلز میں صحافیوں سے گفتگو کرتے ہوئے یوکرینی صدر نے بتایا کہ ان کی فوج روسی جیٹ شاہد ڈرونز کو فضا میں تباہ کرنے کے لیے جو انٹرسیپٹر ڈرونز استعمال کرتی ہے، وہ مکمل طور پر سٹار لنک نیٹ ورک سے منسلک ہوتے ہیں تاکہ اہداف کو بروقت نشانہ بنایا جا سکے۔

صدر زیلنسکی نے واضح کیا کہ روس کے جیٹ انجن والے جدید شاہد ڈرونز 400 کلومیٹر فی گھنٹہ سے زائد رفتار سے پرواز کرتے ہیں۔ اس کے مقابلے میں سٹار لنک نے انٹرنیٹ سے منسلک رہنے کے لیے زیادہ سے زیادہ رفتار محدود کر دی ہے، جس کے نتیجے میں دفاعی مشینری بے اثر ہو رہی ہے۔

یوکرینی قیادت نے اس صورتحال پر شدید افسوس کا اظہار کرتے ہوئے کہا کہ مطلوبہ رفتار پر انٹرنیٹ رابطہ منقطع ہونے کی وجہ سے یوکرین متعدد مقامات پر اپنے شہریوں کی جانیں بچانے میں ناکام رہا۔ انہوں نے زور دے کر کہا کہ یہ محض تکنیکی خرابی نہیں بلکہ بظاہر ارادتاً کیا گیا فیصلہ ہے۔

دفاعی امور کے مطابق منگل کی شب اچانک نافذ کی جانے والی اس پابندی کے تحت اب اگر کوئی ڈرون 160 کلومیٹر فی گھنٹہ سے تیز پرواز کرتا ہے تو اس کا سیٹلائٹ رابطہ خود بخود منقطع ہو جاتا ہے، جس سے اس کا کنٹرول مکمل طور پر ختم ہو جاتا ہے۔

نیٹو میں امریکہ کے سابق سفیر کرٹ وولکر نے اس پیش رفت پر تبصرہ کرتے ہوئے کہا کہ سٹار لنک یوکرین کو فضائی خطرات بروقت دیکھ کر شہریوں کو بچانے کا ذریعہ فراہم کرتا ہے۔ ان کا کہنا تھا کہ ایسے نازک وقت میں سہولت محدود کرنا انتہائی بے رحم اور سنگ دلانہ فیصلہ ہے۔

سٹار لنک نیٹ ورک کو نجی خلائی کمپنی سپیس ایکس چلاتی ہے، جو ایلون مسک کی ملکیت ہے۔ زمین کے نچلے مدار میں موجود 10 ہزار سے زائد فعال سیٹلائٹس کا یہ دنیا کا سب سے بڑا مجموعہ ہے، جو دنیا کے دور دراز علاقوں اور جنگ زدہ میدانوں میں تیز رفتار انٹرنیٹ فراہم کرتا ہے۔

یوکرین میں یہ سیٹلائٹ نیٹ ورک عسکری مواصلات اور ڈرون جنگ کی ریڑھ کی ہڈی بن چکا ہے۔ روایتی ریڈیو سگنلز کے مقابلے میں سٹار لنک کے ذریعے آپریٹرز طویل فاصلے سے بھی اپنے ڈرونز کو سگنل جام ہوئے بغیر کنٹرول کرنے کی صلاحیت رکھتے ہیں۔

انسٹیٹیوٹ فار دی سٹڈی آف وار کے جارج باروس کے مطابق سٹار لنک کی بدولت یوکرینی فوج کو حقیقی وقت میں اہداف دیکھنے کی سہولت ملتی ہے، جس سے ہدف کی نشان دہی سے لے کر اسے نشانہ بنانے تک کا وقت انتہائی کم ہو جاتا ہے۔

اس نظام کا ایک فوجی ورژن بھی موجود ہے جسے سٹارشیلڈ کہا جاتا ہے۔ سٹارشیلڈ بنیادی طور پر امریکی حکومت اور پینٹاگون کے زیرِ انتظام کام کرتا ہے اور اس میں عسکری ضروریات کے تحت سکیورٹی کے سخت ترین معیارات شامل کیے گئے ہیں تاکہ حساس معلومات محفوظ رہ سکیں۔

دوسری جانب سپیس ایکس کے سربراہ ایلون مسک نے وضاحت کی ہے کہ سٹارشیلڈ پر کنٹرول امریکی حکومت اور فوج کے پاس ہے، اس لیے رفتار یا استعمال سے متعلق کوئی بھی حد امریکی فوج اور بالآخر امریکی صدر کی جانب سے طے کی جاتی ہے۔

ایلون مسک نے سوشل میڈیا پلیٹ فارم ایکس پر مزید لکھا کہ سٹار لنک ایک تجارتی سروس ہے جس کا دائرہ کار صرف شہری اور دفاعی مقاصد تک محدود ہے، لہٰذا کسی تجارتی کمپنی کے لیے جارحانہ عسکری کارروائیوں کا حصہ بننا موزوں نہیں ہو گا۔

یوکرینی حکام کے مطابق یوکرین کے پاس اس وقت سٹار لنک کا کوئی فوری متبادل موجود نہیں ہے۔ اگر فضائی رابطے کی رفتار پر لگی یہ قدغن برقرار رہتی ہے تو روس کے تیز رفتار شاہد ڈرونز کا تعاقب کرنا یوکرینی فضائی دفاع کے لیے ناممکن حد تک مشکل ہو جائے گا۔