وفاقی حکومت نے 11 اکتوبر 2026 کے آرٹیکلز 232 اور 234 کے تحت جاری اعلان کی مدت کے لیے پاک فوج کی تعیناتی کی اجازت دے دی، پاک فوج کی تعیناتی کا مقصد شہریوں کی جان و مال اور سرکاری تنصیبات کا تحفظ یقینی بنانا ہے۔

حکم نامے کے مطابق خیبر پختونخوا میں امن و امان اور شہریوں کے تحفظ کے لیے پاک فوج سول انتظامیہ کی معاونت کرے گی۔

گورنر خیبر پختونخوا، جی ایچ کیو کے ملٹری آپریشنز ڈائریکٹوریٹ سے مشاورت کے بعد تعینات کیے جانے والے فوجی دستوں اور وسائل کی تعداد کا تعین کریں گے، پاک فوج کی تعیناتی سے متعلق حکم نامہ آئندہ گزٹ آف پاکستان، پارٹ ٹو میں شائع کیا جائے گا۔

صدر مملکت آصف علی زرداری نے خیبر پختونخوا میں ایمرجنسی کے نفاذ کی سمری پر دستخط کر دیے ہیں۔ صدر مملکت نے آئین کے آرٹیکل 232 اور 234 کے تحت خیبر پختونخوا میں ایمرجنسی اور گورنر راج لگانے کی سمری پر دستخط کیے۔

وفاقی کابینہ کی منظوری کے بعد وزیراعظم ہاؤس سے صدر مملکت کو ایمرجنسی کے نفاذ کے لیے ایڈوائس بھجوا دی گئی تھی۔ وزیر داخلہ محسن نقوی اور طلال چوہدری یہ سمری لے کر ایوان صدر پہنچے تھے۔

اس سے قبل وزیراعظم شہباز شریف کی زیر صدارت جاری اجلاس میں وفاقی کابینہ نے خیبر پختونخوا میں آئین کے آرٹیکل 232 اور 234 کے تحت ایمرجنسی اور گورنر راج لگانے کی منظوری دی۔ اجلاس کے بعد جاری اعلامیے میں کہا گیا تھا کہ خیبر پختونخوا میں آئین کے آرٹیکل 232 اور 234 دونوں کا نفاذ ہوگا، جس کے تحت گورنر راج اور ایمرجنسی لگائی جائے گی۔

اعلامیے کے مطابق اجلاس میں کے پی میں امن و امان کی صورتحال اور دہشت گردی کی بگڑتی صورتحال پر بریفنگ دی گئی۔ کابینہ نے خیبر پختونخوا میں امن و امان کی بگڑتی ہوئی صورتحال کا تفصیلی جائزہ لیا۔

دشت گردی کے خلاف جنگ سے کے پی حکومت کی دانستہ لا تعلق کے پیش نظر حالات کا جائزہ لیا گیا اور وفاقی کابینہ نے وزیراعظم کو خیبر پختونخوا میں آئین کے آرٹیکل 232 اور 234 کے تحت ایمرجنسی کی تجویز دی۔

خیبر پختونخوا میں دہشت گردی کے بڑھते واقعات کے خاتمے کے لیے وفاقی حکومت صوبے میں آپریشن کی خواہاں تھی جب کہ سہیل آفریدی کی حکومت مخالفت کرتی آ رہی تھی۔

وزیراعلیٰ کے پی سہیل آفریدی نے 27 ستمبر کو اسلام آباد مارچ کا اعلان کیا تاہم مارچ کے آغاز سے دو روز قبل اس احتجاج کو ایک ہفتے کے لیے موخر کرتے ہوئے 5 اکتوبر کو اسلام آباد مارچ کرنے کا اعلان کیا۔

تاہم 5 اکتوبر سے قبل پی ٹی آئی اور حکومت کے درمیان مذاکرات کے کئی دور ہوئے جس میں فریقین نے مطالبات ایک دوسرے کے سامنے رکھے۔ تاہم کئی ادوار کے بعد بھی فریقین کسی معاہدے پر متفق نہ ہو سکے اور یوں مذاکرات ناکام ہو گئے۔

وزیراعلیٰ کے پی کے مطالبات تھے کہ بانی پی ٹی آئی عمران خان اور ان کی اہلیہ بشریٰ بی بی کو تمام قانونی حقوق فراہم اور طبی سہولتیں فراہم کی جائیں۔ دونوں کو اپنے وکلا سے ملاقات کا حق دیا جائے۔ خواتین، بزرگ اور بیمار قیدیوں کے مقدمات میں غیر ضروری تاخیر ختم کی جائے۔ یاسمین راشد اور بشریٰ بی بی سمیت سیاسی خواتین کو جلد رہا کیا جائے۔

وفاقی حکومت کا کے پی میں دہشت گردی کے خلاف اقدامات اور متاثرہ اضلاع میں وفاقی حکومت کے آپریشن سے متعلق امور پر صوبائی حکومت کی معاونت اور غیر مشروط حمایت سے متعلق امور پر ڈیڈ لاک برقرار رہا۔

صدارتی اعلامیے میں کہا گیا ہے کہ یہ اقدام آئینِ پاکستان کے آرٹیکل 232 اور 234 کے تحت اٹھایا گیا ہے۔ اعلامیے کے مطابق صوبائی حکومت دہشت گردی کے تدارک اور امن و امان برقرار رکھنے میں ناکام رہی ہے، جس کے باعث صوبے میں آئینی نظام کا تعطل پیدا ہو گیا تھا۔

گورنر راج کے نفاذ کے ساتھ ہی خیبر پختونخوا کی صوبائی حکومت کے اختیارات معطل کر دیے گئے ہیں۔ وزیراعلیٰ، صوبائی وزراء، مشیران، معاونین خصوصی اور ایڈووکیٹ جنرل اپنے عہدوں سے فارغ ہو چکے ہیں، جبکہ گورنر خیبر پختونخوا اب صوبے کے ایڈمنسٹریٹر کے طور پر تمام انتظامی امور سنبھالیں گے۔

صوبے میں انتظامی ڈھانچے میں بڑی تبدیلیاں شروع کر دی گئی ہیں۔ وفاقی حکومت نے ڈاکٹر محمد فخر عالم عرفان کو نیا چیف سیکریٹری خیبر پختونخوا تعینات کر دیا ہے، جبکہ سابق چیف سیکریٹری شہاب علی شاہ کو او ایس ڈی بنا دیا گیا ہے۔

انتظامی ردوبدل کے تحت متعدد اعلیٰ افسران کے تبادلے بھی کیے گئے ہیں۔ اسٹیبلشمنٹ ڈویژن نے گریڈ 21، 20 اور 19 کے کئی افسران کو صوبے سے تبدیل کر کے رپورٹ کرنے کے احکامات جاری کیے ہیں۔ اس کے علاوہ چار نئے پولیس افسران کو بھی خیبر پختونخوا میں تعینات کیا گیا ہے۔

ذرائع کے مطابق وفاقی حکومت نے فیصلہ کیا ہے کہ سابقہ فاٹا کے اضلاع سمیت ٹانک، ڈی آئی خان، لکی مروت اور بنوں کے لیے ایک الگ سیکریٹریٹ قائم کیا جائے گا۔ اس سیکریٹریٹ میں ایڈیشنل چیف سیکریٹری اور ایڈیشنل آئی جی پولیس تعینات ہوں گے تاکہ ان علاقوں میں سیکیورٹی اور انتظامی امور کو بہتر بنایا جا سکے۔

گورنر خیبر پختونخوا فیصل کریم کنڈی نے صدارتی اعلامیے کا خیرمقدم کرتے ہوئے کہا ہے کہ صوبے کے عوام امن و ترقی چاہتے ہیں۔ انہوں نے واضح کیا کہ قانون کو ہاتھ میں لینے والوں کے خلاف آہنی ہاتھوں سے نمٹا جائے گا اور عوام اداروں کے ساتھ مل کر دہشت گردی کا مقابلہ کریں گے۔

دوسری جانب، پاکستان تحریک انصاف کی جانب سے دعویٰ کیا گیا ہے کہ وزیراعلیٰ خیبر پختونخوا سہیل آفریدی اور پی ٹی آئی کے صوبائی صدر جنید اکبر کو گرفتار کر لیا گیا ہے۔

وفاقی کابینہ نے یہ فیصلہ ایک خصوصی اجلاس میں کیا جس میں صوبے کی سیکیورٹی صورتحال پر تفصیلی بریفنگ دی گئی تھی۔ کابینہ نے اس بات پر تشویش کا اظہار کیا کہ صوبائی حکومت دہشت گردی کے خلاف جنگ میں دانستہ طور پر لاتعلقی کا مظاہرہ کر رہی تھی۔

گورنر راج کے نفاذ سے قبل وفاقی حکومت نے مولانا فضل الرحمان سے بھی رابطے کیے تاکہ سیاسی سطح پر معاملات کو حل کرنے کی آخری کوشش کی جا سکے۔

صوبائی اسمبلی کے اختیارات اب پارلیمان یا اس کے اختیار کے تحت استعمال کیے جائیں گے۔ گورنر کو ہدایت دی گئی ہے کہ وہ وفاقی حکومت کی جانب سے تفویض کردہ امور کو آئین کے مطابق انجام دیں تاکہ صوبے میں امن و امان کی بحالی کو یقینی بنایا جا سکے۔

خیبر پختونخوا میں سیکیورٹی کے حوالے سے ریڈ الرٹ جاری کر دیا گیا ہے، خاص طور پر اہم سرکاری تنصیبات اور قانون نافذ کرنے والے اداروں کے دفاتر کی حفاظت کے لیے اضافی نفری تعینات کی جا رہی ہے۔

وفاقی حکومت کی جانب سے اس اقدام کو صوبے میں آئینی حکمرانی اور امن کی بحالی کے لیے ناگزیر قرار دیا گیا ہے۔