اسلام آباد میں انسدادِ پولیو پر منعقدہ ایک جائزہ اجلاس کی صدارت کرتے ہوئے وزیراعظم نے کہا کہ پولیو کا خاتمہ ایک بڑا چیلنج ضرور ہے، تاہم حکومت کا عزم اس چیلنج سے کہیں زیادہ مضبوط ہے۔

وزیراعظم نے انسدادِ پولیو مہمات میں مصروف فرنٹ لائن ورکرز اور قانون نافذ کرنے والے اداروں کی خدمات کو سراہتے ہوئے کہا کہ ان کی سکیورٹی اور رسائی کو یقینی بنانا حکومت کی ذمہ داری ہے۔

اجلاس کے دوران وزیراعظم نے وفاقی وزراء اور متعلقہ حکام کو ہدایت کی کہ وہ فوری طور پر چاروں صوبوں کا دورہ کریں اور وزرائے اعلیٰ و چیف سیکرٹریز کے ساتھ مشاورت کر کے ایک ہفتے کے اندر انسدادِ پولیو کا مربوط لائحہ عمل تیار کریں۔

اجلاس کو بریفنگ دیتے ہوئے بتایا گیا کہ ضلع خیبر سے پولیو کا ایک نیا کیس سامنے آنے کے بعد رواں سال ملک میں پولیو کیسز کی مجموعی تعداد 9 ہو گئی ہے۔

رپورٹ کے مطابق 2026 کے دوران خیبر پختونخوا کے ضلع خیبر سے 3، بنوں سے 3 اور شمالی وزیرستان سے ایک کیس رپورٹ ہوا، جبکہ سندھ کے اضلاع کراچی شرقی اور سجاول سے ایک ایک کیس سامنے آیا۔

بریفنگ میں یہ بھی بتایا گیا کہ ضلع خیبر سے رپورٹ ہونے والے تمام کیسز افغانستان کے پولیو وائرس سے جڑے ہوئے ہیں، اور سرحد پار سے نقل و حرکت پولیو کے پھیلاؤ کی ایک بڑی وجہ ہے۔

حکام نے اجلاس کو آگاہ کیا کہ پنجاب میں فروری 2025 سے اب تک پولیو کا کوئی کیس سامنے نہیں آیا، جبکہ بلوچستان میں بھی 2025 اور 2026 کے دوران کوئی کیس رپورٹ نہیں ہوا۔

آزاد جموں و کشمیر اور گلگت بلتستان پہلے ہی پولیو سے پاک قرار دیے جا چکے ہیں، جبکہ سندھ کے ماحولیاتی نمونوں میں پولیو وائرس کی مقدار میں کمی دیکھی گئی ہے۔

وزیراعظم نے ہدایت کی کہ پولیو سے متاثرہ اور حساس علاقوں میں حفاظتی ٹی کہ جات کی کوریج کو مزید بہتر بنایا جائے اور معمول کی امیونائزیشن کے عمل کو تیز کیا جائے۔

اجلاس میں نائب وزیراعظم اسحاق ڈار، وفاقی وزراء مصدق ملک، احد خان چیمہ، سید مصطفیٰ کمال، عطاء اللہ تارڑ، وزیر مملکت ڈاکٹر ملک مختار احمد بھرتھ اور فوکل پرسن عائشہ رضا فاروق نے شرکت کی۔