یہ انکشاف چیئرمین پاکستان ٹیلی کمیونیکیشن اتھارٹی میجر جنرل ریٹائرڈ حفیظ الرحمان نے قومی اسمبلی کی قائمہ کمیٹی برائے انفارمیشن ٹیکنالوجی کے اجلاس کے دوران کیا۔

اجلاس میں بریفنگ دیتے ہوئے چیئرمین پی ٹی اے نے بتایا کہ ملک میں روزانہ کی بنیاد پر 560 ملین لوگ یوٹیوب پر ویڈیوز دیکھتے ہیں۔

انہوں نے اعداد و شمار پیش کرتے ہوئے کہا کہ اس وقت مجموعی طور پر 96 ملین پاکستانی یوٹیوب کے صارفین ہیں۔

ٹک ٹاک کے حوالے سے گفتگو کرتے ہوئے ان کا کہنا تھا کہ ملک میں اس ایپ کے 10 کروڑ صارفین کے اکاؤنٹس رجسٹرڈ ہیں۔

واٹس ایپ کے استعمال کے بارے میں انہوں نے انکشاف کیا کہ پاکستانی واٹس ایپ پر روزانہ ایک ارب کالز کرتے ہیں۔

ان کا کہنا تھا کہ واٹس ایپ کے ذریعے ملک بھر میں روزانہ 12 ارب پیغامات ارسال کیے جاتے ہیں۔

اجلاس میں وفاقی وزیر برائے انفارمیشن ٹیکنالوجی و ٹیلی کمیونیکیشن شزا فاطمہ بھی موجود تھیں جنہوں نے نے بھی کمیٹی کو بریفنگ دی۔

وفاقی وزیر نے کہا کہ سوشل میڈیا اور مصنوعی ذہانت کے بڑھتے ہوئے استعمال کی وجہ سے ملک میں ڈیٹا کی کھپت میں بہت زیادہ اضافہ ہو چکا ہے۔

شزا فاطمہ نے بتایا کہ نواز شریف کے جانے کے بعد طویل عرصہ تک کوئی سپیکٹرم آکشن منعقد نہیں کی گئی تھی۔

ان کا کہنا تھا کہ نواز شریف ملک کو فور جی سروس دے کر گئے تھے اور موجودہ دور میں فائیو جی کی سپیکٹرم آکشن کی گئی ہے۔

وفاقی وزیر نے فائیو جی کے حوالے سے بتایا کہ اس وقت ملک میں 18 لاکھ افراد فائیو جی سروسز استعمال کر رہے ہیں۔

انہوں نے مزید کہا کہ ملک کے 24 شہروں میں فائیو جی سروسز متعارف کرائی جا رہی ہیں اور نیٹ ورک کو بہتر بنانے کے لیے اقدامات جاری ہیں۔

ٹیلی کام سروسز میں درپیش خرابیوں کی وجوہات بیان کرتے ہوئے ان کا کہنا تھا کہ اس کی پشت پر کئی عوامل کارفرما ہیں۔

شزا فاطمہ نے کمیٹی کو بتایا کہ بعض اوقات پورے کا پورا ٹاور ہی چوری ہو جاتا ہے جبکہ ڈیزل اور جنریٹر چوری ہونے کے مسائل بھی پیش آتے ہیں۔

موصولہ تفصیلات کے مطابق ملک میں ڈیجیٹل پلیٹ فارمز اور انٹرنیٹ کا استعمال تیزی سے بڑھ رہا ہے جس کے نتیجے میں ٹیلی کام انفراسٹرکچر پر بھی دباؤ بڑھ رہا ہے۔

حکام کا کہنا ہے کہ صارفین کو معیاری اور بلا تعطل خدمات فراہم کرنے کے لیے تمام ممکنہ چیلنجز پر قابو پانے کی کوشش کی جا رہی ہے۔