ترجمان وزارت اطلاعات کے مطابق افغانستان میں موجود دہشت گرد گروہوں کی موجودگی اور ان کی جانب سے پاکستان میں کارروائیاں کسی سے ڈھکی چھپی نہیں ہیں، جنہیں محض بیان بازی سے چھپایا نہیں جا سکتا۔

وزارت نے واضح کیا کہ افغان حکومت کو دہشت گردی کے ٹھوس شواہد کا جواب دینا چاہیے اور ان عناصر کے خلاف عملی اور قابلِ تصدیق کارروائی کرنی چاہیے جو پاکستان کی سلامتی کے لیے خطرہ بنے ہوئے ہیں۔

اقوام متحدہ کی سلامتی کونسل کی رپورٹ کا حوالہ دیتے ہوئے وزارت نے کہا کہ افغانستان میں 6 ہزار کے قریب کالعدم تنظیم کے کارندے موجود ہیں، جو خطے کے امن کے لیے ایک بڑا چیلنج ہیں۔

بیان میں مزید کہا گیا کہ افغان طالبان کی جانب سے تحریک طالبان پاکستان (ٹی ٹی پی) کی حمایت کے شواہد موجود ہیں، جو دوحہ معاہدے اور عالمی وعدوں کی کھلی خلاف ورزی کے زمرے میں آتے ہیں۔

وزارت اطلاعات نے اس بات پر افسوس کا اظہار کیا کہ افغان طالبان حکومت دہشت گردی کے خطرے سے انکار کرنے کے بجائے اپنی ذمہ داریوں سے پہلو تہی کر رہی ہے، جس سے خطے میں عدم استحکام بڑھ رہا ہے۔

پاکستان نے ہمیشہ پڑوسی ملک کے ساتھ پرامن تعلقات اور مذاکرات پر زور دیا ہے، تاہم بامعنی پیش رفت کے لیے افغان طالبان کو انسدادِ دہشت گردی کے اپنے وعدوں کو عملی جامہ پہنانا ہوگا۔

بیان میں کہا گیا کہ پاکستان اپنے شہریوں کے تحفظ، دفاع اور ملکی سلامتی کے لیے تمام ضروری اقدامات کرنے کا مکمل حق رکھتا ہے اور اس پر کوئی سمجھوتہ نہیں کیا جائے گا۔

وزارت اطلاعات نے افغان طالبان کی جانب سے لڑکیوں کی تعلیم پر پابندیوں اور بنیادی انسانی حقوق کی خلاف ورزیوں پر بھی گہری تشویش کا اظہار کیا ہے اور اسے عالمی اصولوں کے منافی قرار دیا ہے۔

پاکستان کا موقف ہے کہ افغان سرزمین کا استعمال روکنا افغان حکومت کی اولین ذمہ داری ہے، جس کے بغیر خطے میں پائیدار امن کا قیام ممکن نہیں ہے اور نہ ہی دوطرفہ تعلقات میں بہتری آ سکتی ہے۔

حکومت پاکستان نے عالمی برادری سے بھی مطالبہ کیا ہے کہ وہ افغانستان میں موجود دہشت گردی کے نیٹ ورکس کے خاتمے کے لیے اپنا کردار ادا کرے تاکہ خطے کو مزید تباہی سے بچایا جا سکے۔

پاکستان کی جانب سے یہ بیان ایسے وقت میں سامنے آیا ہے جب سرحد پار سے دہشت گردی کے واقعات میں اضافہ دیکھا گیا ہے، جس پر پاکستان نے بارہا اپنی تشویش کا اظہار کیا ہے۔

وزارت اطلاعات نے اس عزم کا اعادہ کیا کہ پاکستان دہشت گردی کے خلاف اپنی جنگ جاری رکھے گا اور کسی بھی صورت میں اپنی سرزمین کو کسی کے خلاف استعمال نہیں ہونے دے گا، اسی طرح کی توقع دوسروں سے بھی ہے۔

سیکیورٹی حکام کے مطابق ان عناصر نے سرحد پار افغانستان میں اپنے ٹھکانے اور پناہ گاہیں قائم کر رکھی ہیں جہاں سے وہ پاکستانی حدود میں حملوں کی منصوبہ بندی کرتے ہیں۔ افغانستان میں طالبان کی حکومت کے قیام کے بعد سے اسلام آباد کو توقعات تھیں کہ کابل انتظامیہ دہشت گرد نیٹ ورکس کے خلاف مؤثر اقدامات کرے گی۔

پاکستان نے اس مقصد کے لیے افغان حکومت کے ساتھ سیاسی، سفارتی اور انٹیلی جنس سطح پر بھرپور رابطے استوار رکھے اور ثبوت بھی فراہم کیے لیکن عملی اقدامات کے فقدان سے صورت حال میں خاطر خواہ بہتری نہیں آ سکی۔ مبصرین کے مطابق افغان سرزمین پر موجود عسکریت پسند گروہوں کے خلاف کارروائی سے گریز کی وجوہات میں نظریاتی قربت اور داخلی دباؤ کے خدشات شامل ہیں۔

گلوبل ٹیررازم انڈیکس کے اعدادوشمار کے مطابق افغانستان میں طالبان کی واپسی کے بعد پاکستان میں دہشت گردی کے واقعات میں بتدریج اضافہ ریکارڈ کیا گیا ہے جس سے انسانی جانوں کا ضیاع بھی ہوا۔ اعدادوشمار ظاہر کرتے ہیں کہ مختلف برسوں کے دوران دہشت گردی سے متاثرہ ممالک کی فہرست میں پاکستان کی پوزیشن میں نمایاں تبدیلی آئی ہے۔

سال 2026 کے دوران اب تک دہشت گردانہ کارروائیوں کے نتیجے میں 1,327 افراد جاں بحق اور 2,484 زخمی ہو چکے ہیں۔ سیکیورٹی ماہرین کا کہنا ہے کہ اس صورت حال کے سدباب کے لیے سرحد پار سے ہونے والی نقل و حرکت پر قابو پانا انتہائی ضروری ہو چکا ہے۔

سیکیورٹی تجزیہ کار میجر جنرل (ر) رضا محمد کا کہنا ہے کہ پاکستان کے پاس ناقابل تردید شواہد موجود ہیں جو ظاہر کرتے ہیں کہ افغانستان دہشت گردوں کی محفوظ پناہ گاہ بن چکا ہے۔ ان کا کہنا تھا کہ بیرونی عناصر پاکستان کے اندر عدم استحکام پھیلانے والے گروہوں کی مالی معاونت میں بھی ملوث ہیں۔

تشویش ناک امر یہ ہے کہ پاکستان میں کارروائیوں میں ملوث افراد میں افغان شہریوں کی شمولیت کے شواہد بھی سامنے آئے ہیں۔ انٹیلی جنس رپورٹس کے مطابق دراندازی کرنے والے جنگجوؤں کی ایک بڑی تعداد کا تعلق افغانستان سے ہے جن میں سے کئی کی شناخت بھی کی جا چکی ہے۔

رپورٹس کے مطابق سال 2026 کے دوران پاکستان میں کارروائیوں کے دوران مارے جانے والے 260 سے زائد افغان شہریوں کی شناخت نام اور خاندانی تفصیلات سے ہوئی ہے۔ اس کے علاوہ حساس نوعیت کے واقعات میں بھی افغان شہریوں اور سابق اراکین کے ملوث ہونے کے شواہد ملے ہیں۔

بین الاقوامی سلامتی کے امور کے ماہر خرم عباس کا کہنا ہے کہ یہ معاملہ صرف چشم پوشی تک محدود نہیں بلکہ عسکریت پسندوں کو مالی معاونت اور دیگر سہولتیں بھی فراہم کی جا رہی ہیں۔ ان کا کہنا ہے کہ افغان صوبوں میں بھرتی کی مہمات کے ذریعے افراد کو سرحد پار کارروائیوں کے لیے بھیجا جاتا ہے۔

سابق سفیر منصور علی خان کے مطابق افغان طالبان اور بعض عسکریت پسند گروہوں کے درمیان گہرے نظریاتی روابط اور پرانے تعلقات موجود ہیں۔ یہی وجہ ہے کہ کابل انتظامیہ کے لیے اپنے سابق ساتھیوں کے خلاف سخت کارروائی کرنا مشکل امر بن جاتا ہے۔

ماہرین کا یہ بھی ماننا ہے کہ عسکریت پسند گروہ طالبان کی نچلی اور درمیانی سطح کی صفوں میں سرایت کر چکے ہیں۔ نظریاتی ہم آہنگی اور مشترکہ جنگی تجربات کی وجہ سے دونوں کے درمیان سماجی اور مذہبی نیٹ ورک ایک دوسرے سے جڑے ہوئے ہیں۔

کچھ تجزیہ کاروں کا خیال ہے کہ طالبان کو اپنے اندرونی خلفشار اور بغاوت کا بھی خدشہ ہے کیونکہ سخت قدم اٹھانے سے ان کے اپنے جنگجوؤں میں ناراضی پیدا ہو سکتی ہے۔ اس تزویراتی مخمصے کی وجہ سے افغان حکومت دوغلے پن کا شکار نظر آتی ہے۔

ماہر منظر زیدی کا کہنا ہے کہ طالبان کو اس بات کا بھی اندیشہ ہے کہ دباؤ بڑھنے کی صورت میں یہ گروہ کسی دوسری حریف تنظیم کے ساتھ اتحاد نہ کر لیں۔ اس صورت حال میں کابل انتظامیہ کے لیے اپنے اقتدار کو برقرار رکھنا اور بھی زیادہ پیچیدہ ہو سکتا ہے۔

افغانستان میں صرف ایک ہی نہیں بلکہ متعدد علاقائی اور بین الاقوامی عسکریت پسند تنظیمیں موجود ہیں۔ ان میں فتنہ الخوارج کے ساتھ ساتھ دیگر علیحدگی پسند اور کالعدم گروہ بھی شامل ہیں جو افغان سرزمین کو اپنے مقاصد کے لیے استعمال کر رہے ہیں۔

جنرل (ر) رضا محمد کا مزید کہنا تھا کہ یہ تمام گروہ طالبان کے لیے طاقت کا ذریعہ بنے ہوئے ہیں اور وہ اپنے اقتدار کو طول دینے کے لیے ان پر انحصار کرتے ہیں۔ پاکستان نے متعدد بار ان امور پر دوٹوک موقف اپنایا ہے کہ افغان سرزمین کا استعمال روکا جائے۔

پاکستانی حکام کا مؤقف ہے کہ خطے میں پائیدار امن کے قیام کے لیے ضروری ہے کہ افغانستان اپنی سرزمین کو کسی بھی ملک کے خلاف دہشت گردی کے لیے استعمال نہ ہونے دے۔ اسلام آباد اس حوالے سے عالمی برادری پر بھی زور دیتا رہا ہے کہ وہ اس سنگین مسئلے کا نوٹس لے۔