پیر کی صبح شہر کے مختلف حصوں میں فضائی آلودگی کا اشاریہ تین سو پچاس سے تجاوز کر گیا جسے انتہائی شدید اور صحت کے لیے خطرناک قرار دیا گیا ہے۔ سنٹرل پولوشن کنٹرول بورڈ کے اعداد و شمار کے مطابق شہر کے کئی علاقوں میں آلودگی کا یہ درجہ چار سو سے بھی زیادہ ریکارڈ کیا گیا۔

بھارت کی سپریم کورٹ نے اس تہوار کے دوران فضائی آلودگی کو قابو میں رکھنے کے لیے پابندیاں عائد کی تھیں جن کے تحت صرف مخصوص سبز پٹاخے مخصوص گھنٹوں میں چلانے کی اجازت دی گئی تھی۔ تاہم عدالتی احکامات کے باوجود بڑے پیمانے پر خلاف ورزیاں کی گئیں جس سے فضا مزید زہریلی ہو گئی۔

عالمی ادارہ صحت کے مقرر کردہ معیار کے مطابق فضائی آلودگی کی یہ سطح شہریوں کی صحت کے لیے سنگین خطرات کا باعث بن رہی ہے۔ سرد موسم اور فضا میں جمود کے ساتھ ساتھ اسموگ کی یہ موٹی چادر آنے والے دنوں تک دارالحکومت پر چھائی رہ سکتی ہے۔