Daily Pakistan Online News, Sports, Blogs, Media
Related Articles
سیالکوٹ۔19دسمبر (ڈیلی پاکستان آن لائن):وزیر اعلی پنجاب کی معاون خصوصی اطلاعات ڈاکٹر فردوس عاشق اعوان نے کہا ہے کہ جلد پیپلز پارٹی جلد پی ڈی ایم کی کشتی سے چھلانگ لگانے والی ہے, صرف شاہی خاندان کی کرپشن بچانے والے ہی رہ جائیں گے۔ انہوں نے کہاکہ لاہور کے جلسے کے تمام سہولت کاروں پر ایف آئی درج کرائی گئی، جلسہ کے منتظمین سے 1کروڑ 27لاکھ روپے کی وصولیاں کی جائیں گی۔
سیالکوٹ میں میڈیا سے گفتگو کرتے ہوئے فردوس عاشق اعوان نے کہا کہ شوباز شریف اینڈ گینگ نے شہریوں کی زمینوں پر قبضے کرائے۔ان کے ادوار میں اراضی ارکارڈ سنٹرز کو آگ ہی لگتی رہی پنجاب میں ہر بڑے قبضہ مافیا کو ن لیگ کے جید رہنماؤں پشت پناہی حاصل رہی۔انہوں نے کہا کہ تحریک انصاف عوام کی ملکیتی زمینوں اور ریکارڈ کی حفاظت کے لئے صوبہ بھر میں کمپیوٹر آئزڈ اراضی ریکارڈ سنٹرز پر کام کر رہی ہےحکومت کمپیوٹرائزیشن کے نظام کو ضلعی سطح پر، پھر تحصیل اور پھر یونین کونسل کی سطح تک لیکر جائے گی۔حکومت اراضی کی رجسٹریشن اور انتقال کے عمل کو آسان اور محفوظ بنا رہی ہے۔انہوں نے کہا کہ رجسٹریشن کا عمل کمپیوٹرائزڈ طریقے سے 4 آسان مرحلوں میں صرف 11 دن میں مکمل ہو گا۔
فردوس عاشق اعوان کا کہنا تھا کہ نواز شریف پاکستان آئیں اور آئین و قانون کو جواب دیں۔اپوزیشن کو عوام کا دکھ نہیں, لانگ مارچ اور دھرنا گیڈر بھبکیاں ہیں.انہوں نے مزید کہاکہ مانگا کی سیاست کے بانی اور بریف کیس سیاست متعارف کرانے والے شفاف الیکشن سے خوف زدہ ہیں۔شو آف ہینڈزکے ذریعے سینٹ الیکشن شفافیت کی وجہ سے جمہوری اقدار کے فروغ کے لئے اہم ترین ہے لیکن لوٹ مار کے بادشاہوں اور کرپشن کی شہزادی کو یہ قابل قبول نہیں.
انہوں نے کہا کہ وزیر اعظم عمران خان نے سیاست کو کرپشن سے پاک کرنے کے لئے شو آف ہینڈز کے ذریعے سینٹ الیکشن کی بات کی ہے جو کہ جمہوریت کے حقیقی خدمت ہے۔شو آف ہینڈز کے ذریعے سینٹ الیکشن ملک میں جمہوری اقدار کے فروغ،ذمہ دارانہ رویوں اور عوامی نمائندوں کے وقار میں اضافہ کا باعث ہو گا۔معاون خصوصی نے مزید کہا کہ پی ڈی ایم کرپشن کی کشتی پر سوار ہے جس کا مقدر ڈوبنا ہے سیاسی نابالغ اور چال باز مولانا کو اپنا مفاد عزیز ہے۔انہوں نے کہایہ تمام شور و غوغا لوٹی ہوئی دولت کو بچانے اور اپنی سیاسی زندگی کی بقا ء کے لئے ہے وگرنہ تو ان کی کرپشن طشت از بام ہے۔انہوں نے کہاکہ پاکستان کے باشعور عوام نے مفرور نواز شریف کے بیانیے کو مسترد کیا ،اب ان کی نا عاقبت اندیش باقیات کے بیانیہ کو بھی مسترد کیا جا رہا ہے.
انہوں نے کہا کہ گذشتہ تین دہائیوں سے ملک کو لوٹنے والے ان لوگوں کا چہرہ عوام نے پہچان لیا ہے ۔یہ لوگ کرپشن کی پیداوار ہیں ،کرپشن کے زیر سایہ پروان چڑھے ہیں اور اس کرپشن کو بچانے کے لئے ہی ایک دوسرے کی مدد سے عوام میں پذیرائی حاصل کرنا چاہ رہے ہیں اور کہاکہ پی ڈی ایم والے اس طرح پاکستان کے باشعور عوام کی آنکھوں میں دھول نہیں جھونک سکتے۔
