Daily Pakistan Online News, Sports, Blogs, Media
Related Articles
پوپ فرانسس کی مستعفی ہونے کی تردید، سرجری کے بعد نارمل زندگی گزار رہا ہوں
روم (ڈیلی پاکستان آن لائن) پوپ فرانسس مستعفی ہونے کے بارے میں نہیں سوچ رہے ہیں اور جولائی میں آنتوں کی سرجری کے بعد “بالکل نارمل زندگی” گزار رہے ہیں۔انہوں نے ان خیالات کا اظہار بدھ کو نشر ہونے والے ایک ریڈیو انٹرویو میں کیا۔ہسپانوی ریڈیو نیٹ ورک COPE سے بات کرتے ہوئے 84 سالہ فرانسس نے اطالوی اخبار کی اس رپورٹ کو مسترد کر دیا کہ شاید وہ استعفیٰ دے دیں۔میں نہیں جانتا کہ انہیں پچھلے ہفتے سے یہ خیال کہاں سے آیا کہ میں استعفیٰ دینے والا ہوں اور حیرت کی بات ہے کہ یہ خیال میرے ذہن میں بھی نہیں آیا۔انہوں نے یہ بھی کہا کہ وہ نومبر میں گلاسگو میں اقوام متحدہ کی موسمیاتی تبدیلی کانفرنس (COP26) میں لازمی شرکت کریں گے۔ انٹرویو میں ، پوپ نے ویٹیکن میں ایک مرد نرس کا شکریہ ادا کیا کہ انہوں نے اینٹی بائیوٹکس اور دیگر ادویات کے ساتھ علاج جاری رکھنے کی بجائے انہیں قائل کیا کہ وہ اپنے کولون کا کچھ حصہ ہٹانے کے لیے سرجری کروانے پر راضی ہو جائیں۔ اس نے میری زندگی بچائی ہے۔ فرانسس ، جو 2013 میں پونٹف منتخب ہوئے تھے ، نے 4 جولائی کو سرجری کروائی اور 11 دن ہسپتال میں زیر علاج رہے۔انہوں نے کہا ہے کہ اب میں وہ سب کچھ کھا سکتا ہوں جسے کھانا پہلے ممکن نہیں تھا۔ میں بالکل نارمل زندگی گزار رہا ہوں۔ انہوں نے مزید کہا کہ ان کی آنت کا 33 سینٹی میٹر حصہ سرجری کر کے نکال دیا گیا ہے۔ انہوں نے 12 سے 15 ستمبر کو ہنگری اور سلوواکیہ کے دورے اور پائپ لائن میں قبرص ، یونان اور مالٹا کے دوروں کے ساتھCOP26 میں شرکت کے ساتھ اپنے مکمل شیڈول کا خاکہ پیش کرتے ہوئے اپنے ممکنہ استعفیٰ کی رپورٹ کو مزید مسترد کردیا۔
