پروفیسر ساجد میر نے پی ٹی آئی پرپابندی کا فارمولہ پیش کردیا

لاہور(ڈیلی پاکستان آن لائن)مرکزی جمعیت اہلحدیث پاکستان کے سربراہ سینیٹر پروفیسر ساجد میر نے پی ٹی آئی پرپابندی کا فارمولہ پیش کردیا۔ایک اعلامیہ میں اپنے ردعمل کا اظہار کرتے ہوئے ساجد میر نے کہا کہ اگرحکومت کے پاس پی ٹی آئی پر پابندی کاقانونی جواز، دلائل اور شواہد موجود ہیں تو سپریم کورٹ میں کیس دائر کردے،حکومت کو خودپابندی کااقدام نہیں اٹھانا چاہیے۔اگر سپریم کورٹ سمجھے کہ پابندی لگنی چاہیے تو لگادے،اس طرح اس اقدام کو قانونی تحفظ بھی مل جائے گا اور پابندی بھی لگ جائے گی ۔انہوں نے کہا کہ علی امین گنڈا پور اور بشری بی بی سیاست نہیں دہشتگردی کے راستے پر گامزن ہیں،اسلام آباد میں علی امین اور بشری بی بی کاطرزعمل جمہوری سیاسی جماعت کی بجائے ایک دہشتگرد تنظیم کی طرح تھا۔پختون جمہوریت ،فوج اور ملک کے وفادار ہیں دہشتگردوں کے نہیں،بانی پی ٹی آئی اپنے دور حکومت میں امن وامان کے قیام کے لیے فوج اور اداروں کے اقدامات کا دفاع کیا کرتے تھے۔ پروفیسر ساجد میر نے مزید کہا کہ آج اداروں کی طرف سے انہیں سپورٹ مل جائے تو بانی پی ٹی آئی پھر ان کے لیے زندہ باد کے نعرے لگائیں گے۔ بانی پی ٹی آئی کی سیاست منافقت اور مفادات کے کھیل کے گرد گھومتی ہے۔