Daily Pakistan Online News, Sports, Blogs, Media
Related Articles
جنوبی پنجاب کو ترقی یافتہ نہ بنایا تومیرا نام شہباز شریف نہیں، ن لیگ کا بڑا اعلان
ڈیرہ غازی خان(ڈیلی پاکستان آن لائن) پاکستان مسلم لیگ ن کے صدر اور قائد حزب اختلاف شہباز شریف نے کہا ہے کہ اچھا وقت آنے والا ہے ، جنوبی پنجاب کو سنٹرل پنجاب سے ترقی یافتہ بنائیں گے ۔ جنوبی پنجاب کو وسطی پنجاب نہ بنا دیا تو میرا نام شہباز شریف نہیں ۔پریس کانفرنس کرتے ہوئے شہباز شریف نے کہا کہ حکومت کو بھگانے تک سکون سے نہیں بیٹھیں گے ۔ عوام کے ساتھ مل کر مارچ کریں گے اور حکومت کو نکالیں گے ۔ ریاست مدینہ کا ذکر کرنے والوں نے عوام کو رلا دیا ہے ۔انہوں نے کہا کہ عمران نیازی تمہارا وقت پورا ہوچکا ہے ۔ حکومت نے 3 سال میں عام آدمی کی زندگی اجیرن کر دی ہے ۔ ن لیگ ، پی ٹی آئی کا موازنہ کرلو ، دودھ کا دودھ اور پانی کا پانی ہوجائے گا ۔صدر ن لیگ نے کہا کہ کون کہتا تھا ڈالر کے مقابلے میں روپیہ گر جائے تو وزیراعظم چور ہے ۔ کون کہتا تھا پٹرول مہنگا ہوجائے تو حکومت اور وزیراعظم چور ہے ۔ کنٹینر پر چڑھ کر کون کہتا تھا کرپشن ہو تو وزیراعظم چور ہے ۔انہوں نے کہا کہ ن لیگ کے دور میں چینی 52 روپے کلو تھی ، آج 120 روپے کلو ہے ۔ دن رات مہنگائی کی جا رہی ہے ، دن رات جھوٹ بولا جارہا ہے ۔ پی ٹی آئی حکومت نے عوام کیلئے کچھ نہیں کیا ، نواز شریف کے دور میں مہنگائی 3 فیصد تھی اب 14 فیصد ہوگئی ہے ۔ یہ جھوٹ بولتے ہیں کہ پاکستان میں مہنگائی خطے میں سب سے کم ہے.ٹرانسپیرنسی انٹرنیشنل نے رپورٹ میں کہا ہے کہ پی ٹی آئی کے دور میں سب سے زیادہ کرپشن ہوئی ۔ مہنگائی اور غربت نے عوام کی کمر توڑ دی ہے ۔ حکومت نے اب تک 15 ہزار ارب کے قرضے لیے ہیں ۔شہباز شریف نے مزید کہا کہ جولائی 2010 میں جنوبی پنجاب میں بدترین سیلاب آیا تھا جس سے لاکھوں ایکڑ زمینیں تباہ ہوگئی تھیں ۔ سیلاب میں جنوبی پنجاب میں دن رات حاضر ہوتا تھا ۔ مصیبت کے وقت جنوبی پنجاب کے ساتھ رہا اور سیلاب متاثرین میں اربوں روپے تقسیم کیے ۔ ن لیگ نے جنوبی پنجاب کو دوبارہ آباد کیا ۔انہوں نے کہا کہ میں یہاں اپنی خدمات بتانے نہیں آیا بس یہ کہنا چاہتا ہوں کہ جب مشکل وقت تھا تو نواز شریف اور یہ خادم حاضر تھا ۔
