Daily Pakistan Online News, Sports, Blogs, Media
Related Articles
افسران کے استعفوں کی افواہیں مسترد ،فوج اپنے چیف جنرل عاصم منیر کی قیادت میں متحد ہے، ڈی جی آئی ایس پی آر
کسی نے احکامات کی خلاف ورزی نہیں کی ہے،کسی نے استعفیٰ نہیں دیا ،مارشل لا کا کوئی سوال پیدا نہیں ہوتا، میجر جنرل احمد شریف
راولپنڈی (ڈیلی پاکستان آن لائن)پاک فوج کے شعبہ تعلقات عامہ (آئی ایس پی آر)کے ڈائریکٹر جنرل (ی جی)میجر جنرل احمد شریف نے فوج کے افسران کے استعفوں سے متعلق افواہوں کو یکسر مسترد کرتے ہوئے کہا ہے کہ فوج اپنے چیف جنرل عاصم منیر کی قیادت میں متحد ہے اور جمہوریت کے مکمل حامی ہیں لہذا مارشل لا کوئی سوال ہی پیدا نہیں ہوتا۔نجی ٹی وی سے گفتگو میں میجر جنرل احمد شریف چوہدری نے کہا کہ اندرونی شرپسندوں اور بیرونی دشمنوں کی بھرپور کوششوں کے باوجود فوج جنرل عاصم منیر کے زیر متحد تھی، متحد ہے اور متحد رہے گی، کسی نے ان کے احکامات کی خلاف ورزی نہیں کی ہے۔میزبان کی جانب سے سوال کیا گیا کہ جونیئر افسران کی جانب سے استعفوں کی خبریں گردش کر رہی ہیں کیا اس میں صداقت ہے تو انہوںنے کہاکہ یہ صرف افواہیں ہیں، کسی نے استعفیٰ نہیں دیا اور ان افواہوں میں کوئی حقیقت نہیں ہے، فوج جنرل عاصم منیر کی قیادت میں متحد ہے۔مارشل لا سے متعلق سوال پر کہا کہ جنرل عاصم منیر کی قیادت میں فوج دل و جان سے جمہوریت کی حمایت کرتی ہے اور مارشل لا کی کوئی گنجائش نہیں ہے، آرمی چیف اور فوج آرمی کی سینئر قیادت جمہوریت پر مکمل یقین رکھتی ہے اور مارشل لا کا کوئی سوال پیدا نہیں ہوتا۔
