احتساب عدالت نے خواجہ آصف کا 13جنوری تک جسمانی ریمانڈ منظور کر لیا
لاہور 31 دسمبر (ڈیلی پاکستان آن لائن) لاہور کی احتساب عدالت نے مسلم لیگ ن کے رہنما خواجہ آصف کا 13 جنوری تک جسمانی ریمانڈ منظور کر لیا۔
جمعرات 31 دسمبر کو خواجہ آصف کو آمدن سے زائد اثاثے کے الزام میں احتساب عدالت پیش کیا گیا۔ وکیل نجم الحسن نے کہا کہ اینٹی کرپشن عدالت گوجرانوالہ میں بھی 14 جنوری کو کیس ہے اس لیے تاریخ بدل دیں، جس پر عدالت نے 14 جنوری کے بجائے 13 جنوری تک ریمانڈ منظور کرلیا۔
جج نے استفسار کیا کہ کیا آپ نے گرفتاری کی گراؤنڈز ملزم کو دے دیں؟ نیب پراسیکیوٹر نے کہا کہ ’جی دے دی ہیں‘۔
نیب پراسیکیوٹر نے عدالت کو بتایا کہ خواجہ آصف 81 کروڑ 20 لاکھ کے اثاثوں کے مالک ہیں اور يہ انکی ذرائع آمدن سے مطابقت نہیں رکھتے۔ 23 کروڑ کا فرق ہے۔
خواجہ آصف نے عدالت کو کہا کہ نیب کو کہیں کہ تاریخیں ہی درست کر لیں۔ اتنی بار ممبر پارلیمنٹ رہا اور صرف 81 کروڑ نکالا، پیسے تو کوئی زیادہ تلاش کرتے۔ خواجہ آصف کے بیان پر عدالت میں قہقہے لگ گئے۔
#خواجہ_آصف، #احتساب_عدالت، #جسمانی_ریمانڈ، #نیب،