کوٹ لکھپت میں قید پی ٹی آئی کے مرکزی رہنمائوں کا قیادت سے بڑا مطالبہ

لاہور( ڈیلی پاکستان آن لائن)کوٹ لکھپت جیل میں قید پاکستان تحریک انصاف کے رہنمائوںشاہ محمود قریشی ، سینیٹر اعجاز احمد چوہدری ، ڈاکٹر یاسمین راشد ، عمر سرفراز چیمہ اور میاں محمود الرشید نے قیادت کے نام اہم خط لکھ دیا ۔ پی ٹی آئی کے میڈیا سیل کے مطابق خط میں کہا گیا ہے کہ سردست احتجاجی تحریک معطل کر دی جائے ، 27 نومبر اسلام آباد کے قتل عام پر ملک گیر سوگ کا اعلان کیا جائے ،پورے ملک میں گلی محلوں ، وارڈ ، یونین کونسل کی سطح پر تعزیتی اجلاس منعقد اور قرآن خوانی کا اہتمام کیا جائے ،شہدا ء کے گھروں اور قبروں پر حاضری دی جائے اور اہل خانہ سے تعزیت کی جائے ۔خط میں مزید کہا گیا ہے کہ میڈیا و سوشل میڈیا پر قتل عام کی مکمل تفصیلات ثبوتوں کے ساتھ پوری شدومد سے پیش کی جائیں ۔ بانی چیئرمین عمران خان کی اجازت سے شہدا ء فنڈ کا قیام عمل میں لایا جائے۔