ڈیوٹی میں غفلت پر ملازمین کیخلاف سخت کارروائی کی جائیگی’ایم ڈی سیڈ کارپوریشن

علی ارشد رانا کا ساہیوال سنٹر کا اچانک دورہ ،صفائی کے ناقص انتظامات پر افسران کی سخت سرزنش
لاہور (ڈیلی پاکستان آن لائن) منیجنگ ڈائریکٹر پنجاب سیڈ کارپوریشن علی ارشد رانا نے ساہیوال سنٹر کا اچانک دورہ کیا، جہاں انہوں نے مختلف شعبہ جات کی کارکردگی کا تفصیلی جائزہ لیا۔ دورے کے دوران پی ایس سی پلانٹ پر صفائی کے ناقص انتظامات دیکھ کر تمام متعلقہ افسران کی سخت سرزنش کی اور اپنے فرائض سے غفلت برتنے والے افسر کو فوری طور پر تبدیل کرنے کا حکم دیا۔ایم ڈی پنجاب سیڈ کارپوریشن نے کہا کہ صفائی نصف ایمان ہے دیگر پلانٹوں خانیوال، رحیم یار خان، پپلاں، گوجرانوالہ اور جھنگ کی صفائی ستھرائی کا خیال رکھاجائے،میں سر پرائز وزٹ کروں گا جس میں اپنی ذمہ داریاں احسن طریقے سے انجام دینے والے ملازمین کی حوصلہ افزائی کی جائے گی اور وہ شاباش کے مستحق ہوں گے۔ علی ارشد رانا نے کہا کہ تمام ملازمین نیک نیتی اور دیانت داری کے ساتھ اپنے فرائض سرانجام دیں۔ انہوں نے خبردار کیا کہ ڈیوٹی میں غفلت برتنے والے ملازمین کے خلاف سخت کارروائی کی جائے گی، جبکہ اپنی ذمہ داریاں احسن طریقے سے انجام دینے والے ملازمین کی حوصلہ افزائی کی جائے گی اور وہ شاباش کے مستحق قرار پائیں گے۔