پی ٹی آئی کو دھچکا۔۔۔ سلمان اکرم راجہ کے بعد حامد رضا کور و سیاسی کمیٹی سے مستعفی

لاہور( ڈیلی پاکستان آن لائن)پاکستان تحریک انصاف کو 24نومبر کے ناکام احتجاج کے بعد پارٹی کی سطح پر بھی مشکلات کا سامنا ہے ،سیکرٹری جنرل سلمان اکرم راجہ نے عہدے سے استعفیٰ دیدیا جبکہ صاحبزداہ حامد رضا بھی پی ٹی آئی کی کور کمیٹی اور سیاسی کمیٹی سے مستعفی ہوگئے ۔پی ٹی آئی کے سیکرٹری جنرل سلمان اکرم راجہ نے اپنا استعفیٰ پارٹی قیادت کو بھیج دیا ہے جس کی تصدیق چیئرمین پارٹی بیرسٹر گوہر علی خان کی جانب سے کر دی گئی ہے۔سلمان اکرم راجہ کی جانب سے کہا گیا کہ بطور سیکرٹری جنرل میرا استعفیٰقبول کیا جائے جبکہ پارٹی کیلئے بطور وکیل خدمات سرانجام دیتا رہوں گا۔سلمان اکرم راجہ نے اپنی ذاتی وجوہات کی بناء پر استعفیٰ دیا ہے جبکہ ذرائع کے مطابق چوبیس نومبر کے احتجاج میں نظر نہ آنے پر شدید تنقید کی وجہ سے سلمان اکرم راجہ عہدے سے مستعفی ہوئے ہیں۔سلمان اکرم راجہ کو رواں برس ستمبر میں عمران خان کی ہدایت پر پارٹی کا جنرل سیکرٹری مقرر کیا گیا تھا۔پی ٹی آئی چیئرمین بیرسٹر گوہر نے گفتگو کرتے ہوئے سلمان اکرم راجہ کے استعفے کی تصدیق کی اور بتایا کہ وہ مستعفی ہوگئے ہیں تاہم ان کا استعفیٰ منظور نہیں کیا گیا ہے اور انہیں فیصلے پر نظر ثانی کرنے کا کہا گیا ہے۔دوسری جانب رکن قومی اسمبلی صاحبزادہ حامد رضا نے بھی پی ٹی آئی کی کور کمیٹی اور سیاسی کمیٹی سے استعفیٰ دے دیا ہے۔