پنجاب بڑی تباہی سے بچ گیا،انٹیلی جنس بیسڈ آپریشن میں34 دہشتگرد گرفتار

لاہور( ڈیلی پاکستان آن لائن) کائونٹر ٹیرر ازم ڈیپارٹمنٹ کی جانب سے دہشتگردی کے خدشات کے پیش نظر پنجاب کے مختلف شہروں میں رواں ماہ 242انٹیلی جنس بیسڈ آپریشن کے دوران 34دہشت گرد گرفتارکئے گئے۔ترجمان سی ٹی ڈی کے مطابق یہ کاروائیاں لاہور ، بہاولنگر، بہاولپور، گجرانوالہ، فیصل آباد ، راولپنڈی ، نارووال ، سرگودھا ، چکوال ، جہلم ، اٹک ، گجرات ، بھکر اور رحیم یار خان میں کی گئیں۔ترجمان کے مطابق لاہور سے فتنہ الخوارج سمیت دیگر تنظیموں کے 11انتہائی خطرناک دہشتگرد باروی مواد اوراہم عمارتوں کے نقشوں سمیت گرفتارکیے گئے ۔دہشتگردوں سے دھماکہ خیز موا، 28ڈیٹونیٹر ، 89فٹ حفاظتی فیوز وائر، گولیاں اسلحہ، ایک ہینڈ گرنیڈ، چار آئی ای ڈی بم ، پرائما کارڈ، موبائل فون ، ممنوعہ پمفلٹ ، نقدی برآمد کرلی ۔ترجمان کے مطابق دہشتگردوں کی شناخت زبیر، اسلم، ابوبکر ، فدا حسین ، فہد سلیم ، سیف اللہ ، نفیس ، اصرار ، حاجی شاہ اور عبداللہ وغیرہ کے نام سے ہوئی ، دہشتگرد لاہور میں ایک اہم سرکاری عمارت کو ٹارگٹ کرنا چاہتے تھے ۔ترجمان کا بتانا ہے کہ رواں ماہ میں 7536کومبنگ آپریشنز کے دوران637مشتبہ افراد گرفتار کیے ، کومبنگ آپریشنز میں 235630افراد سے پوچھ گچھ کی گئی ۔