وزیر اعلیٰ مریم نواز شریف نے جوان بیٹیوں کے والدین کا بوجھ اٹھا لیا

لاہور( ڈیلی پاکستان آن لائن)پنجاب دھی رانی پروگرام کے تحت رواں ماہ دسمبر سے اجتماعی شادیاں کروانے کا باقاعدہ آغاز کرنے کا فیصلہ کر لیا گیا ۔ وزیراعلی پنجاب مریم نواز شریف کی ہدایت پر دھی رانی پروگرام کے تحت تشکیل دی جانے والی سٹیئرنگ کمیٹی کا اجلاس صوبائی وزیر سوشل ویلفیئر اینڈ بیت المال سہیل شوکت بٹ کی زیر صدارت ہواجس میں وزیراعلی پنجاب مریم نواز کے سیاسی مشیر ذیشان ملک نے خصوصی شرکت کی ۔ اجلاس کے شرکاء کو بتایا گیا کہ دسمبر 2024 سے اجتماعی شادیاں کروانے کا باقاعدہ آغاز کر دیا جائے گا،وزیراعلی پنجاب مریم نواز شریف کے دست شفقت سے اس نیک عمل کا آغاز لاہور سے کیا جائے گا،ایسی غریب یتیم اور جسمانی معذوری کا شکار خواتین جن کے والدین معذور ہیں اور ان کی عمر 18 سے 40 سال کے درمیان ہو وہ اس پروگرام میں شمولیت کی اہل ہیں۔بریفنگ میں بتایا گیا کہ وزیراعلی پنجاب مریم نواز شریف، دھی رانی پروگرام کے تحت صوبہ بھر کے تمام اضلاع میں پہلے مرحلے میں 1500 مستحق جوڑوں کی اجتماعی شادیاںکروائی جائیں گی۔