مغوی بینک منیجر کے قتل کا ڈراپ سین، دوست قاتل نکلا

لاہور( ڈیلی پاکستان آن لائن)گلبرگ پولیس نے دوست کے قتل میں ملوث مرکزی ملزم کوگرفتار کر لیا، مغوی احسن سلیم کی لاش نہر سے ملی تھی ،پولیس نے سیف سٹی کیمروں سمیت دیگر ذرائع سے ملزم کو والٹن سے ٹریس کرکے گرفتار کر لیا۔ایس پی ماڈل ٹائون اخلاق اللہ تارڑ نے ایس ایچ او گلبرگ کی سربراہی میں ٹیم تشکیل دی تھی۔ ایس پی ماڈل ٹائون نے بتایا کہ مقتول احسن سلیم بینک آف پنجاب گلبرگ میں منیجر تھا،جمعہ کی شام کو ملزم عبد اللہ نے مقتول کو کال کر کے والٹن روڈ بلایا، ملزم مقتول کو بہانے سے اغوا ء کر کے والٹن روڈ پر واقع گھر میں لے گیا۔ملزم اور مقتول کے درمیان پیسوں کے عوض جھگڑا ہو اجس پر ملزم عبد اللہ نے فائر کرکے احسن سلیم کوقتل کیا،ملزم نے لاش ہربنس پورہ کے قریب نہر میں پھینک دی تھی۔ پولیس کے مطابق ملزم عبداللہ شاہد کے خلاف مقدمہ درج کرکے مزید تحقیقات جاری ہیں۔