مسرت جمشید چیمہ پی ٹی آئی کی موجودہ قیادت پر بھڑک اٹھیں

لاہور( ڈیلی پاکستان آن لائن) پاکستان تحریک انصاف کی سینئر رہنما مسرت جمشید چیمہ نے کہا ہے کہ موجودہ پارٹی قیادت خدا کا خوف کرے ان میں اتناعدم تحفظ کیوں ہے ، اگر عمران خان کی بہنیں اپنے بھائی کی رہائی کے لئے جدوجہد کرتی ہیں اور موجودہ قیادت کی نالائقی کی نشاندہی کرتی ہیں تو انہیں ہدف بنایا جاتا ہے کہ وہ سیاست کر رہی ہیں، اب کوتاہی ،نا اہلی اور نالائقی کا ساراملبہ بشری بی بی پر بھی ڈالنے کی کوشش ہوتی ہے ۔ ایکس پر جاری اپنے بیان میں مسرت جمشید چیمہ نے کہا کہ ساری تجربہ کار قیادت اگر ان کے ساتھ گرائونڈ پر موجود ہوتی تو شاید بر وقت بہتر سیاسی فیصلے ہوتے،آج انتہائی دکھ کے ساتھ یہ لکھنے پہ مجبور ہوں کے آج سارے ٹاک شوز پارٹی کی اندرونی لڑائیوں پر ہوئے ،شہدا ، زخمی ،مسنگ ورکرز اور بدقسمتی سے اب تو ہماری لاشیں بھی مسنگ کی فہرست میں شامل ہو گئی ہیں اس پہ کوئی خاص بات نہیں ہوئی ۔انہوں نے کہا کہ عمران خان کی فیملی خواہ ان کی اہلیہ ہوں یا بہنیں انہیں عمران خان کی سلامتی اور زندگی کی فکر ہے سیاست کی نہیں،اب فیملی کو بار بار اپنی صفائی دینے کی ضرورت نہیں کہ ہم سیاست میں نہیں آرہے ۔انہوں نے کہا کہ ہمارا فوکس صرف عمران خان ،شہدا اور ورکرز ہونے چاہئیں۔ اللہ شہید وں کے لوحقین کو صبر دے ۔