محسن نقوی کی وطن واپسی، آرام کیے بغیر علی الصبح قذافی سٹیڈیم پہنچ گئے، افتتاحی تقریب کے انتظامات کا جائزہ

لاہور(ڈیلی پاکستان آن لائن )پاکستان کرکٹ بورڈ کے چیئرمین محسن نقوی چین کے دورے کے بعد علی الصبح وطن واپس پہنچ گئے۔ محسن نقوی نے وطن واپسی پر آرام کیے بغیر علی الصبح قذافی سٹیڈیم کا دورہ کیا اور قذافی سٹیڈیم کی افتتاحی تقریب کے انتظامات کا جائزہ لیا۔انہوں نے افتتاحی تقریب کے لئے شاندار انتظامات کی ہدایت کی اور کہا کہ ایونٹ کو نئے قذافی سٹیڈیم کے شایان شان ہونا چاہیے ۔آج پاکستان کے لئے فخر کا مقام ہے۔ریکارڈ مدت میں قذافی سٹیڈیم کی تعمیر نو کا کام مکمل کرنے کا کریڈٹ پوری ٹیم کو جاتا ہے۔دنیائے کرکٹ کا خوبصورت ترین و عالمی معیار کا قذافی سٹیڈیم ریکارڈ مدت میں مکمل ہوا ہے۔قوم سے کیا وعدہ پورا ہونے پر اللہ تعالی کا شکر گزار ہوں۔شائقین کرکٹ اور کھلاڑی سٹیڈیم میں فراہم کردہ جدید سہولتوں سے محظوظ ہوں گے۔ورکرز۔ ایف ڈبلیو او۔ نیسپاک۔ کنٹریکٹر اور پی سی بی کا تہہ دل سے شکریہ ادا کرتا ہوں۔نئے تعمیر کردہ قذافی سٹیڈیم کا آج باقاعدہ افتتاح ہو گا اور وزیراعظم پاکستان محمد شہباز شریف قذافی سٹیڈیم کا افتتاح کریں گے۔عوام کا داخلہ مفت ہو گا۔قذافی سٹیڈیم کی رنگا رنگ افتتاحی تقریب میں معروف سنگر آواز کا جادو جگائیں گے۔علی ظفر۔ عارف لوہار اور آئمہ بیگ افتتاحی تقریب میں پرفارم کریں گے اور آتش بازی ۔ لائٹس شو اور ڈھول کا شاندار مظاہرہ ہو گا۔