رکاوٹیں دور کئے بغیر ” اڑان پاکستان ” میں شامل آئی ٹی کیلئے پیش کئے گئے پرعزم وژن کی تکمیل ممکن نہیں ‘ نجم مزاری

مسائل کی وجہ سے کس طرح مستحکم بین الاقوامی سرمایہ کاری کو متوجہ کیا جا سکتا ہے’انٹر پرینیور ، چیئرمین چلتن پیور پاکستان
لاہور( ڈیلی پاکستان آن لائن) انٹرپرینیور و چیئرمین چلتن پیورپاکستان نجم مزاری نے کہا ہے کہ انٹر نیٹ سے متعلقہ مشکلات اور رکاوٹیں دور کئے بغیر ” اڑان پاکستان ” پروگرام میں شامل آئی ٹی کے شعبے کیلئے پیش کئے گئے پرعزم وژن کی تکمیل ممکن نہیں ،انٹرنیٹ کی آٹیجز اور سوشل میڈیا ایپس پر پابندیوں کی وجہ سے مالی نقصانات میں پاکستان 1.62 ارب ڈالر کے ساتھ دنیا میں پہلے نمبر پر رہا جو لمحہ فکریہ ہونا چاہیے ۔ان خیالات کا اظہار انہوںنے سرکاری و نجی اداروں سے آئی ٹی کی تعلیم حاصل کرنے والے طلبہ کے وفد سے ملاقات میں گفتگو کرتے ہوئے کیا ۔ نجم مزاری نے کہا کہ پالیسی سازوں کو یہ سوچنا چاہے کہ ایکس صرف سیاسی بیان بازی کا پلیٹ فارم نہیں بلکہ اس کی اقتصادی سر گرمیوں کیلئے بھی اہمیت ہے ،ایک عالمی ادارے کی رپورٹ کے مطابق ایکس پر پابندی سب سے زیادہ نقصان دہ ثابت ہوئی ہے ۔انہوں نے کہا کہ حکومت ایک طرف آئی ٹی کو فروغ دینا چاہتی ہے اور دوسری جانب ایسے اقدامات اٹھاتی ہے جس کی وجہ سے اس سے جڑے ہوئے نوجوان متنفر ہو رہے ہیں ۔ چیئرمین چلتن پیورو نجم مزاری نے کہا کہ ہمیں سب سے پہلے خطے میں موجود اپنے روایتی حریف سمیت تمام ممالک کوسٹڈی کرنا چاہیے کہ وہ کس طرح آئی ٹی انڈسٹری کی ترقی سے سالانہ اربوں ڈالرز کما رہے ہیں اور ان کی انڈسٹری دن دوگنی رات چوگنی ترقی کر رہی ہے اور دنیا میں ان کی مانگ بھی ہے ۔ انہوں نے کہا کہ پاکستان میں اچانک جس طرح کے حالات پیدا کر دئیے جاتے ہیں ایسی صورتحال میں ہماری ٹیک اسٹارٹ اپس کس طرح اعلی معیار کی اور مستحکم بین الاقوامی سرمایہ کاری کو اپنی طرف متوجہ کرسکتی ہے اور فری لانس سیکٹر کیسے ترقی کر سکتا ہے ۔حکومت آئی ٹی انڈسٹری کی ترقی کے لئے زیادہ سے زیادہ نجی شعبے سے تجاویز اور معاونت طلب کرے ۔