جوڈیشل کمیشن بنانے کے لئے چیف جسٹس کو خط لکھوں گی ‘ڈاکٹر یاسمین راشد

لاہور (ڈیلی پاکستان آن لائن) پاکستان تحریک انصاف کی رہنما و سابق صوبائی وزیر ڈاکٹر یاسمین راشد نے کہا ہے کہ تحریک انصاف اپنے ایک، ایک کارکن پر ظلم کاحساب لے گی، انسانیت پر ظلم کرتے شرم آنی چاہیے،ان جانوں کا حساب ہوگا۔انہوں نے انسداد دہشت گردی عدالت میں پیشی کے موقع پر میڈیا سے غیر رسمی گفتگو کرتے ہوئے کہا کہ حکومت نے پاکستان کے بچے مار ڈالے، میرے پاس مذمت کے لئے الفاظ نہیں ہیں، افسوس کی بات ہے کہ یہ اب ہم سے لاشوں کا پوچھ رہے ہیں۔پاکستان کی تاریخ میں آج تک ایسا ظلم نہیں دیکھا۔انہوں نے کہا کہ حکومت کو انسانیت پر ظلم کرتے شرم آنی چاہیے، ان جانوں کا حساب ہوگا، مریم نواز کو شرم آنی چاہیے، وہ کہہ رہی ہیں کہ شاباش پنجاب آپ نہیں نکلے۔ڈاکٹر یاسمین نے کہا کہ ہماری حکومت میں مولانا، بلاول بھٹو اور مریم نواز نے لانگ مارچ کئے، ہم نے تو انہیں نہیں روکا، تحریک انصاف جمہوریت پر یقین رکھتی ہے۔رہنما پی ٹی آئی نے کہا کہ تحریک انصاف اپنے ایک ایک کارکنوں پر ظلم کا حساب لے گی، چیف جسٹس کو خط لکھوں گی کہ اس پر جوڈیشل کمیشن بنائے۔