بھارتیہ جنتا پارٹی کی خاتون رہنما پامیلا گو سوامی منشیات سمیت پکڑی گئی.

کولکتہ :20 فروری( ڈیلی پاکستان آن لائن) بھارتیہ جنتا پارٹی کی خاتون رہنما پامیلا گو سوامی منشیات سمیت پکڑی گئی، پولیس نے دوران تلاشی خاتون کے پرس اور گاڑی میں چھپائی گئی کوکین برآمد کرلی۔

تفصیلات کے مطابق بھارت کی حکمران جماعت بھارتیہ جنتا پارٹی (بی جے پی) کی خاتون رہنما پامیلا گوسوامی کو منشیات لے جانے اور استعمال کرنے کے جرم میں گرفتار کرلیا گیا ہے۔

بھارتی میڈیا کی رپورٹ کے مطابق مغربی بنگال کے شہر کولکتہ میں گزشتہ شام پولیس نے دوران چیکنگ ڈرامائی انداز میں بی جے پی کی ایک نوجوان رہنما پامیلا گوسوامی کو اپنے پرس اور کار میں سیٹ کے نیچے کوکین رکھنے کے الزام میں حراست میں لیا۔

ملزمہ کے ساتھ اس کے دوست اور ایک سیکیورٹی گارڈ کو بھی گرفتار کیا گیا ہے۔ بھارتی میڈیا کی رپورٹ کے مطابق یہ واقعہ جمعہ کی شام نیو علی پور علاقے میں اس وقت پیش آیا جب گوسوامی اور ان کا ساتھی این آر ایوینیو کے ایک کیفے کی طرف جارہے تھے، اچانک پولیس نے مصدقہ ثبوت پر اپنی گرفت میں لے لیا۔

پولیس نے تلاشی کے دوران مبینہ طور پر ملزمہ کے پرس اور کار میں سیٹ کے نیچے سے 100 گرام کوکین برآمد کی۔ اس کے فوری بعد پولیس نے انہیں گرفتار کرلیا۔ جیسے ہی پولیس نے اسے گرفتار کیا تو وہ چلانے لگی کہ پولیس مجھے پھنسا رہی ہے۔

پولیس ذرائع کے مطابق پامیلا گوسوامی اور اس کے ساتھی پربیر کو بار بار ایک خاص کیفے میں جانے، کھڑی گاڑی میں کافی دیر تک بیٹھے رہنے اور موٹرسائیکل سے اتر کر کار تک جانے والے ایک نوجوان کے ساتھ مشکوک لین دین کرنے کے بعد پولیس کی نظروں میں آئے تھے۔

منشیات کے سودے کے شبے میں پولیس جمعہ کے روز بی جے پی خاتون رہنما کے آنے کا انتظار کررہی تھی اور پھر ملزمان کو رنگے ہاتھوں پکڑ لیا۔