دشمن طاقتوں کے کہنے پر دہشتگردوں کے ایکشن کا مقصد بلوچستان کے پر امن ماحول کو خراب کر نا اوربنیادی طورپر بے گناہ لوگوں کو نشانہ بنانا تھا
راولپنڈی / اسلام آباد/ کوئٹہ(ڈیلی پاکستان آن لائن +این این آئی) پاک فوج نے کہا ہے کہ بلوچستان کے ضلع قلات میں دہشتگردوں کے حملے میں اٹھارہ سکیورٹی اہلکارشہید ہوگئے ہیں،دوکارروائیوں کے دور ان23دہشتگرد مارے گئے جبکہ صدر مملکت آصف علی زر داری ، وزیر اعظم شہبازشریف ، قائد حزب اختلاف عمر ایوب نے ضلع قلات میں دہشتگرد حملے کی شدید مذمت اور18سیکیورٹی اہلکاروں کی شہادت پر گہرے دکھ اور افسوس کا اظہارکرتے ہوئے کہاہے کہ دہشتگرد عناصر بلوچستان کا امن خراب کرنا چاہتے ہیں، دھشتگرد بلوچستان کے امن و ترقی کے دشمن ہیں،دھشتگردی کی عفریت کے ملک سے مکمل خاتمے تک اس کے خلاف جنگ جاری رکھیں گے ۔ ہفتہ کو آئی ایس پی آر کے ایک بیان کے مطابق 31جنوری اور یکم فروری کی درمیانی شب دہشتگردوں نے منگوچر کے قریب سڑکیں بلاک کر ناشروع کردیں ۔ بیان میں کہاگیاکہ دشمن طاقتوں کے کہنے پر دہشتگردوں کے اس ایکشن کا مقصد بلوچستان کے پر امن ماحول کو خراب کر نا اوربنیادی طورپر بے گناہ لوگوں کو نشانہ بنانا تھا ۔ معلومات حاصل ہونے کے بعد سکیورٹی فورسز اور قانون نافذ کر نے والے اداروں کے اہلکار موقع پر پہنچنے کی کوشش کررہے تھے تاکہ دہشتگردوں کے اس منصوبے ناکام بنایا جائے ۔ آئی ایس پی آر کے مطابق کارروائی کے دور ان بارہ دہشتگرد ہلاک کر دیئے گئے اور مقامی آبادی کے تحفظ کو یقینی بنایا گیا ہے تاہم آپریشن کے دور ان اٹھارہ فوجی اہلکاروں نے بہادری سے لڑتے ہوئے جام نوش کیا ۔ سکیورٹی اہلکاروں نے ملک کیلئے جانوں کا نذرانہ پیش کیا، آئی ایس پی آر کے مطابق واقعہ کے بعد علاقے میں آپریشن کیا گیا تاکہ دہشتگردی کے سہولت کاروں کو گرفتارکیا جاسکے ۔ترجمان پاک فوج نے بتایا کہ قلات کے علاقے منگوچر میں ہونے والی کارروائی کے تناظر میں ہرنائی میں کلیئرنس آپریشن کیا گیا جس میں مزید 11 دہشت گردوں کو ہلاک کیا گیا۔آئی ایس پی آر کے مطابق گھناؤنے اور بزدلانہ فعل کے مرتکب، سہولت کار، اس کی حوصلہ افزائی کرنے والوں کو انصاف کے کٹہرے میں لایا جائے گا،بیان میں کہاگیاکہ پاکستان کے سکیورٹی فورسز قوم کی حمایت سے دہشتگردی کے خاتمے کیلئے پر عزم ہے ۔ آئی ایس پی آر کے مطابق پاکستانی فوج بلوچستان میں استحکام اورترقی کیلئے کام کرتی رہے گی اور ایسی قربانیاں ہمارے بہا در فوجیوں کے ارادے کو مزید مضبوط کریں گی ۔ دریں اثناء صدر مملکت آصف علی زرداری نے ضلع قلات میں دہشتگرد حملے کی شدید مذمت اور18سیکیورٹی اہلکاروں کی شہادت پر گہرے دکھ اور افسوس کا اظہارکرتے ہوئے کہاکہ دہشتگرد عناصر بلوچستان کا امن خراب کرنا چاہتے ہیں،ملک دشمن عناصر کی سرکوبی کی خاطر سیکیورٹی فورسز کی کارروائیاں جاری رہیں گی۔ایوان صدر سے جاری بیان میں صدر مملکت نے دہشت گردوں کے خلاف بروقت کارروائی کرنے اور جامِ شہادت نوش کرنے پر شہدا کو خراج عقیدت کیا اور کارروائی کے دوران 12دہشت گرد جہنم واصل کرنے پر سیکیورٹی اہلکاروں کی بہادری کو سراہا ہے۔صدر نے شہدا کیلئے بلندی درجات، اہل خانہ کیلئے صبر جمیل کی دعا بھی کی۔آصف علی زرداری نے کہاکہ دہشتگرد عناصر بلوچستان کا امن خراب کرنا چاہتے ہیں،ملک دشمن عناصر کی سرکوبی کی خاطر سیکیورٹی فورسز کی کارروائیاں جاری رہیں گی۔صدر مملکت نے کہاکہ پاکستانی عوام ملک کا امن خراب کرنے والے عناصر کو مسترد کرتے ہیں، پوری قوم دہشتگردی کے خلاف جنگ میں اپنی سیکیورٹی فورسز کے ساتھ ہے۔ وزیر اعظم آفس سے جاری اعلامیہ کے مطابق وزیرِ اعظم محمد شہباز شریف نے ضلع قلات میں دہشتگرد حملے کی شدید الفاظ میں مذمت کرتے ہوئے دہشت گردوں کے خلاف کارروائی کے دوران سیکیورٹی فورسز کے 18 اہلکاروں کی شہادت پر گہرے دکھ اور رنج کا اظہار کیا ۔وزیرِ اعظم نے شہدا کی بلندی درجات اور اہل خانہ کیلئے صبر کی دعا ء کی ۔ شہبازشریف نے کہاکہ مجھ سمیت پوری قوم، دھشتگردوں کے ناپاک عزائم کو ناکام بنانے اور وطن عزیز کے تحفظ کیلئے اپنی جان کی قربانی دینے والے جوانوں کو خراج عقیدت پیش کرتی ہے۔وزیرِ اعظم نے 12 دہشت گردوں کو جہنم واصل کرنے پر سیکیورٹی فورسز کے افسران و اہلکاروں کی پزیرائی کی اور کہاکہ دھشتگرد بلوچستان کے امن و ترقی کے دشمن ہیں،دھشتگردی کی عفریت کے ملک سے مکمل خاتمے تک اس کے خلاف جنگ جاری رکھیں گے۔ وزیر اعظم نے کہاکہ مجھ سمیت پوری قوم دھشتگردی کے خلاف جنگ میں اپنی بہادر افواج کے شانہ بشانہ کھڑی ہے۔اپنے بیان میں وزیرداخلہ محسن نقوی نے قلات میں دہشتگردوں کا بہادری سے مقابلہ کرتے ہوئے جام شہادت نوش کرنے والے ایف سی بلوچستان کے18 جوانوں کو زبردست الفاظ میں خراج عقیدت پیش کیا ہے۔ وزیر داخلہ محسن نقوی نے کہا کہ ایف سی بلوچستان کے بہادر سپوتوں نے وطن عزیز کے امن کی خاطر اپنی جانیں قربان کیں، شہید ہونے والے جوانوں کی بہادری پر فخر ہے اور شہدا قوم کے ہیرو ہیں۔ انہوں نے مزید کہا کہ قوم کے18 بہادر سپوت وطن پر قربان ہو کر ہمیشہ کے لیے امر ہوگئے اور شہادت کا بلند رتبہ پایا، 18 جوانوں کی عظیم قربانی کو قوم سلام پیش کرتی ہے۔ وزیر داخلہ نے واضح کیا کہ شہدا کے خاندانوں کے ساتھ کھڑے ہیں۔ انہوں نے اس بات پر زور دیا کہ قوم دہشتگردی کے خلاف جنگ میں سکیورٹی فورسز کی قربانیوں کو قدر کی نگاہ سے دیکھتی ہے۔ انہوں نے شہدا کے اہل خانہ سے دلی ہمدردی و تعزیت کا اظہار کیا ۔ وزیرداخلہ نے منگوچر اور ہرنائی میں 23 دہشتگردوں کو جہنم واصل کرنے پر سکیورٹی فورسز کی تحسین کی اور کہا کہ 23 دہشتگردوں کو عبرتناک انجام تک پہنچانے پر سکیورٹی فورسز کو خراج تحسین پیش کرتے ہیں۔ انہوں نے کہا کہ سکیورٹی فورسز نے دہشتگردوں کے مذموم عزائم کو ناکام بنایا۔ انہوں نے مزید کہا کہ قوم سیکورٹی فورسز کے شانہ بشانہ کھڑی ہے۔دریں اثناء قومی اسمبلی میں قائد حزب اختلاف عمر ایوب خان نے ضلع قلات میں دہشتگرد حملے کی شدید مذمت کرتے ہوئے دہشت گردوں کے خلاف کاروائی کے دوران 18 سیکیورٹی اہلکاروں کی شہادت پر گہرے دکھ اور افسوس کا اظہار کیا ۔اپوزیشن لیڈر قومی اسمبلی نے دہشت گردوں کے خلاف بروقت کاروائی کرنے اور جامِ شہادت نوش کرنے پر شہدا کو خراج عقیدت پیش کیا اور کارروائی کے دوران 12 دہشت گرد جہنم واصل کرنے پر سیکیورٹی اہلکاروں کی بہادری کو سراہا ۔ انہوںنے شہدا کیلئے بلندی درجات، اہل خانہ کیلئے صبر جمیل کی دعا ء اور کہاکہ پوری قوم دہشتگردی کے خلاف جنگ میں اپنی سیکیورٹی فورسز کے ساتھ ہے ادھر گورنر خیبرپختونخوا فیصل کریم کنڈی نے بھی قلات آپریشن پر افواج پاکستان کو خراج تحسین پیش کیا اور کہاکہ بارہ دہشت گردوں کو ٹھکانے لگانے والے بہادر بیٹوں کو سلام پیش کرتے ہیں ۔ انہوںنے کہاکہ قلات میں ریاستی رٹ کو چیلنج کرنے والوں کو منہ توڑ جواب دینے پر پوری قوم سیکورٹی فورسز کے ساتھ ہے ۔ انہوںنے کہاکہ وطن دشمنوں کے عزائم ناکام بنانے میں شہادت پانے والے اٹھارہ بہادروں کو سلام پیش کرتے ہیں ۔ انہوںنے کہاکہ قلات آپریشن کے شہدا کے ساتھیوں اور اہل خانہ کے دکھ میں برابر کے شریک ہیں ۔نائب صدر پیپلز پارٹی سینیٹر شیری رحمان نے قلات میں سیکورٹی فورسز پر حملے کی مذمت کرتے ہوئے کہاکہ قوم کے بہادر بیٹوں نے اپنی جانوں کی پرواہ نہ کرتے ہوئے بلوچستان میں امن کو سبوتاژ کرنے کی کوشش ناکام بنا دی ۔ انہوںنے کہاکہ بزدلانہ حملے کا بھر پور جواب دیتے ہوئے سیکورٹی فورسز کے جوانوں نے 12 دہشتگردوں کو انجام تک پہنچایا۔انہوںنے کہاکہ وطن عزیز کی خاطر جان قربان کرنے والے 18بہادر جوان پوری قوم کا فخر ہیں ۔ شیری رحمن نے کہاکہ قوم اپنے بہادر جوانوں کی قربانیاں کبھی رائیگاں نہیں جانے دے گی،شہدا کے درجات کی بلندی اور اہلخانہ کے لیے صبرو جمیل کی دعا کرتی ہوں۔
