بانی پی ٹی آئی 9مئی واقعات کے ذمہ دار قرار ،8مقدمات میں ضمانتیں مسترد کرنے کا تحریری فیصلہ جاری

لاہور(ڈیلی پاکستان آن لائن)انسداد دہشتگردی کی خصوصی عدالت نے بانی پی ٹی آئی عمران خان کو 9مئی واقعات کا ذمہ دار قرار دیتے ہوئے 8مقدمات میں ضمانتیں مسترد کرنے کا تحریری فیصلہ جاری کر دیا۔انسداد دہشتگردی کی خصوصی عدالت کے جج منظر علی گل نے 7صفحات پر مشتمل تحریری فیصلہ جاری کیا۔تحریری فیصلے میں کہا گیا کہ زمان پارک میں تیار کی گئی سازش کے گواہان کے بیان ریکارڈ پر موجود ہیں، پراسیکیوشن کے مطابق خفیہ پولیس اہلکاروں نے خود کو پی ٹی آئی ورکر ظاہر کرتے ہوئے اس سازش کو سنا تھا، پراسیکیوشن کے پاس بانی پی ٹی آئی کی اشتعال انگیزی کے ہدایات کے آڈیو سمیت دیگر ثبوت موجود ہیں۔عدالتی فیصلے میں لکھا گیا کہ موجودہ کیس سازش یا اشتعال انگیزی پر اکسانے کا کوئی معمولی کیس نہیں ہے، بانی پی ٹی آئی کی ہدایت پر ناصرف لیڈران بلکہ ان کے کارکنان اور حمایتیوں نے سختی سے عمل کیا۔تحریری فیصلے میں کہا گیا کہ وکیل بانی پی ٹی آئی نے اعتراض اٹھایا کہ مبینہ سازش کی کوئی تاریخ، وقت اور جگہ متعین نہیں، پراسیکیوشن کے مطابق زمان پارک میں 7 مئی اور 9 مئی کو اس سازش کو تیار کیا گیا۔فیصلے میں لکھا گیا کہ بانی پی ٹی آئی پر الزام ہے کہ انہوں نے اپنی ممکنہ گرفتاری کے حوالے سے ایک سازش تیار کی، سازش تیار کی گئی کہ گرفتاری کی صورت میں دیگر قیادت ریاستی مشینری کو جام کر دے۔